قازاقستاندا پرەزيدەنتتىك كادرلىق رەزەرۆ قالىپتاساتىن بولادى
مەملەكەت باسشىسىنىڭ ايتۋىنشا، ونىڭ قۇرامىنا كونكۋرستىق نەگىزدە 300 جاس مامان ىرىكتەلىپ الىنباق.
بۇل رەتتە باتىس قازاقستان وبلىسى دا كەلەشەكتە ەلىمىزدىڭ باسقارۋ ەليتاسىنا ەنەتىن لايىقتى ماماندارىن، جاستار وكىلدەرىن ۇسىنا الادى.
پرەزيدەنت جاستار كادر ساياساتى 300 اداممەن شەكتەلمەيتىنىن اتاپ ءوتتى.
«بىزدەر مەملەكەتتىك قىزمەتتىڭ ماڭىزدى ورىندارىنا بىلىكتى كادرلاردى ىزدەپ، بارلىق وڭىردە تاڭداۋ، ىرىكتەۋ جۇمىستارىن جۇرگىزەمىز. ەلىمىزدە جاستاردىڭ ءوز الەۋەتىن ىسكە اسىرۋعا بارلىق مۇمكىندىگى بار. سونىڭ ىشىندە مينيسترلىكتەر مەن اكىمدىكتەر، باسقا دا مەملەكەتتىك ورگاندار قىزمەتكەرلەرى كادر قۇرامىنىڭ تۇراقتىلىعى مەن ساباقتاستىعىن قامتاماسىز ەتۋى ءتيىس. ەل ەرتەڭى جاستار ەكەنىن ۇمىتپاي، ەستافەتانى قابىلداپ الاتىن لايىقتى بۋىن تاربيەلەۋىمىز كەرەك. بۇل - ءومىر زاڭدىلىعى. تۇتاستاي العاندا، بىزدەر تالانتتى جاستاردىڭ ەكونوميكادا، عىلىمدا، ونەردە، سپورت پەن مادەنيەت سالاسىندا وزدەرىن تانىتا الۋى ءۇشىن بارلىق جاعدايدى جاسايمىز. جاستاردىڭ بيزنەس باستامالارىنا جول اشاتىن «جاس كاسىپكەر» باعدارلاماسىن ازىرلەيتىن بولامىز. جاستاردىڭ بولاشاعى بار ستارتاپتارىنا جۇيەلى قولداۋ كورسەتىلەدى. جۇمىس تاجىريبەسى جوق جاس مامانداردى قىزمەتكە العان جۇمىس بەرۋشىلەردى ىنتالاندىرۋ تەتىكتەرى جاسالادى. وسىلايشا جۇمىس جاسامايتىن نەمەسە وقىمايتىن جاستاردىڭ ماسەلەسى شەشىلەدى»، دەدى قاسىم-جومارت توقايەۆ.