سيرياداعى لاڭكەستىككە كۇدىكتى قازاقستاندىقتاردى قانداي جازا كۇتىپ تۇر؟

نۇر-سۇلتان. قازاقپارات - ق ر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەرديەۆ سيريادان قايتارىلعان ازاماتتاردىڭ لاڭكەستىككە قاتىستىلىعى دالەلدەنگەن جاعدايدا ولاردى نە كۇتىپ تۇرعانىن ايتتى، دەپ حابارلايدى قازاقپارات ءتىلشىسى.

«جازا مەرزىمىنە توقتالساق، «جۋسان-1» وپەراتسياسى كەزىندە ەلگە جەتكىزىلگەن ەكى ەر ادام 8 جىلعا باس بوستاندىعىنان ايىرىلدى. بۇل تۇرعىدا قىلمىستىڭ اۋىرلىعى مەن ولاردىڭ تەرگەۋ امالدارىنا كومەگى جانە ءوز ەركىمەن كەلۋى ەسكەرىلدى»، - دەدى ب. راحىمبەرديەۆ سىرتقى ىستەر مينيسترلىگىندە تىلشىلەر ساۋالىنا جاۋاپ بەرە وتىرىپ.

ايتا كەتەيىك، بۇگىن اتالعان ۆەدومستۆودا «جۋسان-2» وپەراتسياسىنا قاتىستى باسپا ءسوز ءماسليحاتى ءوتتى. جاقىندا سيريادان 231 قازاقستان ازاماتىنىڭ ەلگە جەتكىزىلگەنى ءمالىم. قازاقستانعا كەلگەننەن كەيىن 16 ەر ادام مەن 4 ايەل دايش جاعىندا تەرروريستىك ءىس-ارەكەتكە قاتىسى بار دەگەن كۇدىكپەن تۇتقىنعا الىندى.

ۇ ق ك وكىلىنىڭ اتاپ وتۋىنشە، كۇدىكتىلەرگە قاتىستى جازا قىلمىستىڭ اۋىرلىعىنا قاراي ايقىندالادى.

«جالپى العاندا، ىستەگەن ارەكەتىنىڭ اۋىرلىعى بويىنشا ولار 20 جىلعا دەيىن سوتتالۋى مۇمكىن. ياعني بىزدە 2017-جىلى ەكستراديتسيالانعان لاڭكەستىك توپتىڭ ءبىر مۇشەسىنە 20 جىلعا باس بوستاندىعىنان ايىرۋ ۇكىمى شىعارىلعان ەدى. اتاپ ايتقاندا، وسىنداي قىلمىستار ءۇشىن ۇزاق مەرزىم بەرۋ قاراستىرىلعان»، - دەدى ول.

بۇدان بۇرىن حابارلانعانداي، جاقىندا سيريادان 231 قازاقستان ازاماتىنىڭ ەلگە جەتكىزىلۋىنە بايلانىستى ق ر پرەزيدەنتى قاسىم-جومارت توقايەۆ مالىمدەمە جاسادى.

«مەنىڭ تاپسىرمام بويىنشا 7- جانە 9- مامىر كۇندەرى سيريادان 231 قازاقستان ازاماتى ەلگە جەتكىزىلدى، ونىڭ 156 سى - بالالار، دەنى مەكتەپ جاسىنا دەيىنگىلەر، سونىڭ ىشىندە 18 ءى - جەتىم بالالار. بۇل اۋقىمدى گۋمانيتارلىق اكسيا - تۇڭعىش پرەزيدەنت - ەلباسى نۇرسۇلتان نازاربايەۆتىڭ تاپسىرماسىمەن بيىل قاڭتار ايىندا جۇرگىزىلگەن «جۋسان» وپەراتسياسىنىڭ جالعاسى»، - دەلىنگەن مەملەكەت باسشىسىنىڭ مالىمدەمەسىندە.

ەسكە سالساق، بيىل قاڭتاردا ەلباسى سيريادان قازاقستان ازاماتتارىن ەۆاكۋاتسيالاۋ بويىنشا گۋمانيتارلىق وپەراتسياعا بايلانىستى مالىمدەمە جاسادى.