شەتەلگە شىعاتىن بالالارعا ءتولقۇجات جاسالۋى ءتيىس - ءى ءى م
مينيسترلىك مالىمەتىنشە، اتا- انالاردىڭ ءتولقۇجاتىنا بالالارى تۋرالى قولمەن ەنگىزىلگەن جازبادا بيومەتريالىق مالىمەتتەر بولمايدى. سول سەبەپتەن شەكارادان ءوتۋ كەزىندە پروبلەمالار تۋىنداپ، كەي جاعدايدا ازاماتتار كەرى قايتارىلىپ جاتادى.
«الەم بويىنشا قۇجاتتىق- ۆيزالىق باقىلاۋدان وتكىزۋ، جەكە باستى انىقتاۋ شارالارى جەتىلدىرىلۋدە جانە بيومەتريالىق مالىمەتتەرى بار قۇجاتتار (سيفرلى فوتوسۋرەتتەر، ساۋساق تاڭبالارى، كوزدىڭ شاتىرشا قابىعىنىڭ كەسكىنى جانە ت. ب. ) ەنگىزىلۋدە. قازاقستاندىقتار كوپ باراتىن ەلدەردە (ا ق ش، ۇلى بريتانيا، ب ا ءا، يتاليا، يسپانيا، فرانتسيا، چەحيا، سلوۆەنيا، حورۆاتيا، گرەتسيا، ۆەنگريا، پولشا، گەرمانيا، شۆەيتساريا، شۆەتسيا، قىتاي، وڭتۇستىك كورەيا جانە باسقالارى) سول مەملەكەتكە اتا- انالارىمەن كەلگەن بالالاردىڭ ءتولقۇجاتى بولۋى مىندەتتى. ال اتا- انانىڭ ءتولقۇجاتىنا بالالاردىڭ فوتوسۋرەتتەرىن جاپسىرۋ قۇجات رەتىندە مويىندالمايدى» ، - دەپ اتاپ وتەدى ۆەدومستۆودان.
اتا- انالاردىڭ ءتولقۇجاتىنا فوتوسۋرەتتەردى جاپسىرۋدان باس تارتۋ ءبىرىنشى كەزەكتە شەتەلدە قيىن جاعدايدا تاپ بولۋى مۇمكىن بالالاردى قورعاۋعا جانە ولاردى شەتەلگە زاڭسىز تاسىمالداۋ تاۋەكەلدەرىنە بايلانىستى بولىپ وتىر.
بالالارعا ءتولقۇجات تەك شەتەلگە شىققاندا عانا قاجەت. رەسپۋبليكا اۋماعىندا ونىڭ تۋۋى تۋرالى كۋالىكپەن، ۇلكەن ازاماتتار جەكە كۋالىگىمەن راستالادى.
«قازىر جازعى دەمالىس جاقىنداپ كەلەدى. وسىعان بايلانىستى ءى ءى م شەتەلگە بارۋدى جوسپارلاعان اتا- انالارعا باسقا مەملەكەتتىڭ شەكاراسىنان ەركىن ءوتۋ ءۇشىن وزدەرىمەن باراتىن بالالاردىڭ ءتولقۇجاتتارىن كۇنى بۇرىن راسىمدەۋگە كەڭەس بەرەدى» ، - دەلىنگەن مينيسترلىك اقپاراتىندا.