ماقسات يساعابىلوۆ «سىر بارىسى» اتاندى

قىزىلوردا. قازاقپارات - سىر وڭىرىنەن رەسپۋبليكالىق «قازاقستان بارىسى» جارىسىنا قاتىساتىن بالۋاندار بەلگىلى بولدى، دەپ حابارلايدى قازاقپارات ءتىلشىسى.

  قىزىلوردا قالاسىنداعى «ەۆرازيا» سپورت كەشەنىندە قازاق كۇرەسىنەن وبلىستىق «التىن بەلبەۋ» سايىسىنىڭ اقتىق كەزەڭى مارەسىنە جەتتى. بالۋانداردىڭ اتالمىش باسەكەسى بيىل ونىنشى مارتە ۇيىمداستىرىلىپ وتىر.

ول ءۇش كەزەڭ بويىنشا وتكىزىلدى. وعان ءتورت جاس دەڭگەيىندە 8000 عا جۋىق سپورتشى قاتىستى.

ال التىن بەلبەۋ يەسىن انىقتايتىن تۇيە پالۋان سايىسىنا 24 سپورتشى قاتىستى. ولاردىڭ اراسىندا قىزىلوردالىق ماقسات يساعابىلوۆ «سىر بارىسى» اتانىپ، «التىن بەلبەۋ» بەلدىگىنە يە بولدى. وعان 1 ميلليون 125 مىڭ تەڭگەنىڭ سەرتيفيكاتى تابىس ەتىلدى.

ماقساتپەن فينالدا تايتالاسقا تۇسكەن «سىر ارلانى» ارالدىق نۇرىم سالىمگەرەيەۆكە 540 مىڭ تەڭگە بەرىلدى. سونداي- اق، ءۇشىنشى ورىن الىپ «سىر سۇڭقارى» اتانعان قارماقشىلىق مارات بايماحانوۆقا 360 مىڭ تەڭگەنىڭ سەرتيفيكاتى تابىستالدى.

ەلوردامىز - نۇر- سۇلتان قالاسىندا ق ر پرەزيدەنتىنىڭ جۇلدەسى ءۇشىن وتەتىن «قازاقستان بارىسى» رەسپۋبليكالىق تۋرنيرىنە قىزىلوردا وبلىسىنان ماقسات يساعابىلوۆ پەن نۇرىم سالىمگەرەيەۆ وبلىس نامىسىن قورعايدى.

ەستەرىڭىزگە سالا كەتەلىك، «قازاقستان بارىسى» جوباسى العاش رەت 2010 -جىلى قىزىلوردا وبلىسىندا باستاۋ الدى. ال 2011 -جىلدان باستاپ اتالمىش تۋرنير رەسپۋبليكالىق دەڭگەيدە وتكىزىلىپ كەلەدى. سىر ءوڭىرى بالۋاندارىنىڭ اراسىنان بۇگىنگە دەيىن ۇلان رىسقۇل 2011, ەلامان ەرعالييەۆ 2017 -جىلى رەسپۋبليكالىق «قازاقستان بارىسى» اتاعىن جەڭىپ الدى.