ءلايلا قۇلجانوۆا عالامشاردىڭ ەڭ سۇلۋ كەلىنشەگى اتاندى
Universe Beauty-2019 تۇركيانىڭ انتاليا قالاسىندا 1-8- مامىر كۇندەرى ارالىعىندا ءوتتى. ول ەڭ بەدەلدى دەگەن سۇلۋلىق، ءسان جانە تالانتتار بايقاۋلارىنىڭ گراند-فينالى. مۇندا الەمنىڭ 30 ەلىنەن ءتۇرلى بايقاۋلار مەن فەستيۆالداردىڭ جەڭىمپازدارى جينالادى. ول فرانسۋزدىق مودەلەر پەر كاردەننىڭ ۇيىمداستىرۋىمەن ءوتىپ، وعان بەلگىلى ديزاينەرلەر، ونەر قايراتكەرلەرى جانە الەمدىك شوۋ-بيزنەس جۇلدىزدارى قازىلىق ەتەدى.
سەمەيلىك ءلايلا قۇلجانوۆا بۇل بايقاۋعا 2018-جىلعى الەم ميسسيسى اتاعىنىڭ يەگەرى رەتىندە قاتىستى. بىلتىرعى جىلدىڭ سوڭىندا ول ماسكەۋدە وتكەن World Beauty - 2018 بايقاۋىنا قاتىسىپ، ءبىزدىڭ عالامشارىمىزداعى ەڭ ادەمى تۇرمىس قۇرعان ايەل اتانعان بولاتىن.
ءلايلا قۇلجانوۆا سەمەي قالاسىندا ەلىمىزدەگى ەڭ ءىرى بانكتەردىڭ ءبىرىنىڭ بولىمشەسىنە باسشىلىق ەتەدى. قايىرىمدىلىقپەن اينالىسىپ، قوعامدىق شارالارعا بەلسەنە قاتىسادى. «Nur Otan» پارتياسى مەن ىسكەر ايەلدەر قاۋىمداستىعىنىڭ مۇشەسى. بىلتىرعى جىلى ءتۇرلى سۇلۋلىق بايقاۋلارىنىڭ جەڭىمپازى اتانعان بولاتىن.