ايتەكە بي كەنتى مەن قازالى قالاسى بىرىكتىرىلەدى

قىزىلوردا. قازاقپارات - قىزىلوردا وبلىسى قازالى اۋدانىنىڭ ورتالىعى - ايتەكە بي كەنتى مەن قازالى قالاسى الداعى ۋاقىتتا بىرىكتىرىلەدى، دەپ حابارلايدى قازاقپارات ءتىلشىسى.

 قازىرگى تاڭدا اۋدان ورتالىعى - ايتەكە بي كەنتىندە ەكى قاباتتى 12 تۇرعىن ءۇي قۇرىلىسى، 250 ورىندىق اۋداندىق اۋرۋحانا، 600 ورىندىق مادەنيەت ءۇيى مەن باسقا دا الەۋمەتتىك نىساندار سالىنادى دەپ جوسپارلانۋدا. سونداي- اق، بۇل اۋماقتا الداعى ۋاقىتتا 24 كاسىپكەرلىك نىسان بوي كوتەرىپ، اۆتوموبيل جولى قايتا جاڭارتىلادى. سونداي- اق، ايتەكە بي كەنتىندە مەكەمەلەر ءۇيىنىڭ قۇرىلىسى قولعا الىنعان. اتالمىش جوبانى ىسكە اسىرۋ ءبىر عيماراتتا اكىمدىك پەن اۋداندىق بولىمدەردى شوعىرلاندىرۋعا مۇمكىندىك بەرەدى.

 «قازىر اۋداندىق اكىمدىك پەن بولىمدەر بولەك عيماراتتاردا ورنالاسقان. بۇل تۇرعىندار ءۇشىن وتە قولايسىز. ونىڭ ۇستىنە، قازىرگى اۋدان اكىمدىگى عيماراتىنىڭ ىرگەتاسى 1963 -جىلى قالانعان. ەلۋ جىلدان استام ۋاقىت بولعان نىسان بۇگىندە ەسكىرگەن. قازالى اۋدانىنىڭ جاڭا ورتالىعىنىڭ جوسپارىنا سايكەس، مەكەمەلەر ءۇيى، حالىققا قىزمەت كورسەتۋ ورتالىعى، مەكتەپتەر مەن اۋرۋحانالار، سوت پەن مادەنيەت ۇيلەرىنىڭ عيماراتتارى حالىققا ىڭعايلى بولۋ ءۇشىن ءبىر- بىرىنە جاقىن ورنالاستىرىلادى. اۋداندا سوڭعى 2 جىلدا ينفراقۇرىلىمدىق جانە باسقا دا نىسانداردىڭ قۇرىلىسى قارقىندى جۇرگىزىلۋدە. سەبەبى قازالى اۋدانى ينفراقۇرىلىممەن از قامتىلعان اۋدانداردىڭ ءبىرى بولىپ تابىلادى» ، - دەدى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ.

سونداي- اق، قۇرىلىس، ساۋلەت جانە قالا قۇرىلىسى باسقارماسىنىڭ باسشىسى تۇرعىندارعا ىڭعايلى بولۋ ءۇشىن ەكى ەلدىمەكەندى ءبىر ورتالىققا شوعىرلاندىرىپ، الەۋمەتتىك ماڭىزى بار نىسانداردى اۋدان ورتالىعىنا ورنالاستىرۋ قاجەتتىگىن اتاپ ءوتتى.

«وسىعان بايلانىستى زاماناۋي تالاپتارعا ساي كەلەتىن «Open Space" فورماتىنداعى زاماناۋي عيمارات قۇرىلىسى جوسپارلانۋدا» ، - دەدى م. السەرىكوۆ.

اۋداندا جول قۇرىلىسى مەن جوندەۋ جۇمىستارىنا باسىمدىق بەرىلگەن. سەبەبى بۇل - قازالى اۋدانىنداعى ەڭ وزەكتى ماسەلەلەردىڭ ءبىرى سانالادى. 2019 -جىلى قازالى اۋدانىندا جول سالۋ جانە جوندەۋ جۇمىستارى بويىنشا 16 جوبا جوسپارلانۋدا.

  قىزىلوردا وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ مالىمەتى بويىنشا، 2013-2018 -جىلدارى 200 دەن استام الەۋمەتتىك نىسان سالىندى. ايتا كەتۋ كەرەك، جان باسىنا شاققاندا الەۋمەتتىك سالاعا جۇمسالاتىن شىعىندار بويىنشا ايماق سوڭعى 6  جىلدا رەسپۋبليكادا الدىڭعى قاتاردا تۇر.