ميلليون ءسوزى قالاي پايدا بولدى؟

نۇر-سۇلتان. قازاقپارات - ميلليون ءسوزىن ويلاپ تاۋىپ، قولدانىسقا ەنگىزگەن - الەمگە ايگىلى ساياحاتشى ماركو پولو. اعايىندى نيكولو مەن ماففەو پولو جانە نيكولونىڭ بالاسى ماركو ۇشەۋى ريم پاپاسىنىڭ ارنايى تاپسىرماسىمەن قىتايعا اتتانادى.

قازىرگىدەي لەزدە ۇشىپ بارا قويمايدى ول كەزدەگى جيھانكەزدەر. 3,5-4 جىل دەگەندە ارەڭ جەتىپتى الگىلەر قازىرگى بەيجىڭگە. ال ول كەزدە ۇلان- اسىر جەرگە شىڭعىس حاننىڭ نەمەرەسى قۇبىلاي حان امىرلىك ەتىپ وتىرعان. ماركو پولونىڭ جاسى شامامەن جيىرمالاردا. جەدەل جەرگىلىكتى ءتىلدى مەڭگەرىپ، مادەنيەتىمەن، تۇرمىس- تىرشىلىگىمەن تانىسىپ، 17 جىل بويى حاننىڭ قول استىندا ادال قىزمەت ەتەدى. حانمەن بىرگە ءجۇرىپ، بىرگە تۇرىپ، قىتايدىڭ و شەتى مەن بۇ شەتىن ءوز كوزىمەن كورىپ- بىلگەن جيھانكەز كەيىن سونىڭ ءبارىن يتالياعا قايتا ورالعاندا ايتىپ بەرەدى.

قىتايدىڭ حانى وتە باي، سوزبەن ايتىپ جەتكىزۋ مۇمكىن ەمەس دەمەي مە... جاۋابىنا رازى بولمايدى ەستۋشى قۇلاق. «ميلونە!» - دەيدى سول كەزدە بايلىقتىڭ ءبارىن سانمەن سويلەتكىسى كەلگەن ول. ميللە - يتاليانشا مىڭ دەگەن ءسوز. ميلونە دەپ تۇرعانى سونداعىسى مىڭنىڭ مىڭ ەسەسى ەكەن.