سولتۇستىك قازاقستان ورمانىنداعى ەركەك قۇرلار ءبىر اي بويى ءوزارا مىقتىنى انىقتايدى

 نۇر-سۇلتان. قازاقپارات - سولتۇستىك قازاقستان وبلىسىندا قۇرلاردىڭ توبەلەسى باستالدى. بۇل قۇستار كوكتەمدە ءبىر اي بويى ءبىر- ءبىرىن تۇتەپ، ءوزارا مىقتىنى انىقتايدى.

 قاناتتىلاردىڭ جەكپە- جەگىن كورۋ ءۇشىن 24.kz  تەلەارناسىنىڭ ءتۇسىرىلىم توبى ورماندا تۇنەپ، كەرەمەت كورىنىستىڭ كۋاسى بولدى.

ءتۇن. تۇك كورىنبەيتىن قاراڭعىلىق. تابيعات تىم- تىرىس. تاڭ اتا قۇستار قاۋمالاپ، قاتتى شۋلاي باستادى. بۇل قۇرلاردىڭ ايقاسى.

 ايداربەك ايتمۇحامبەت ۇلى، ءتىلشى:

 - ءبىز مۇندا تاڭ اتپاي كەلىپ، كۇركەدە جاسىرىنىپ وتىرمىز. مىنە، 3 ساعاتتاي بولدى قۇرلار انا جەردە توبەلەسىپ، ويران سالىپ جاتىر. ولاردىڭ جەكپە- جەگى وتە تارتىستى. «ايقاس الاڭىنا» 50 شاقتى قۇر قونىپ، ەركەكتەرى ءوزارا مىقتىنى انىقتايدى. ءبارى بالاپانباسارعا ۇناۋ ءۇشىن تارتىسادى. ويتكەنى ولار جەڭىمپازدارمەن عانا جۇپتاسادى. ءتىپتى اعاش باسىندا دا تىنىشتىق جوق. بۇل جىلىنا تەك ءبىر رەت قايتالاناتىن قۇبىلىس.

قۇرلار كوكتەم سايىن وسى ماڭعا ۇشىپ كەلىپ، كورىنىستىڭ كورىگىن قىزدىرادى. ولاردىڭ توبەلەسىن الەكساندر رەمشوۆ 10 جىلدان بەرى ۇزبەي كورىپ كەلەدى.

 الەكساندر رەمشوۆ، اڭشىلىق تانۋشى:

- ورماننىڭ ويانىپ، تابيعاتتىڭ ءتىرىلۋى كەرەمەت ءسات. ونى سوزبەن ايتىپ جەتكىزۋ مۇمكىن ەمەس. تاڭعى 4-تە كەلىپ، قۇستاردىڭ داۋىسىن ەستۋدىڭ ءوزى ءبىر عانيبەت. ءىش- باۋىرىڭ ەلجىرەپ كەتەدى. سولتۇستىك قازاقستان وبلىسىندا بۇعان دەيىن كەزدەسپەگەن اقجاقتى قاراشاقاز قۇسىن تاپتىق. ولار نەگىزى ەۋروپا ارقىلى كوشىپ قونادى. بىزگە اداسىپ كەلگەن عوي...

سولتۇستىك قازاقستان وبلىسىن 270 قۇس ءتۇرى مەكەندەيدى. وڭىردە ولاردى زەرتتەيتىن ارنايى توپ بار. ماماندار قاناتتىلاردىڭ كوشىپ قونۋىن قاداعالاپ، ساناق جۇرگىزەدى.

قازاقستاندا 4 جىلدان بەرى كوكتەمدە قۇس اۋلاۋعا تىيىم سالىنعان. بۇل كەزدە ولاردىڭ ۇياسى مەن بالاپاندارىنا ءورت قانا قاۋىپ توندىرەدى

 www.24.kz