ۇلانباتىردا موڭعوليا اسكەري- اۋە كۇشتەرىنىڭ قولباسشىسى زايسانوۆتى ەسكە الدى
اتاقتى ۇشقىشتىڭ زيراتىنا قازاقستاننىڭ موڭعولياداعى ەلشىسى قالىبەك قوبىلاندين، موڭعوليانىڭ تانىمال جازۋشىسى، قوعام قايراتكەرى سۇلتان تاۋكەي، موڭعوليانىڭ ءمۇفتيى باتىربەك قادىس، «جەرلەستەر» قازاق قوعامىنىڭ ءتوراعاسى تىلەۋحان ناجىكەي، Mongolian Airlines كومپانياسىنىڭ ۇشقىشى، ەكيپاج كومانديرى اۋەز تاشتۋان جانە باسقا دا قوعام قايراتكەرلەرى بارىپ تاعزىم ەتتى.
ءمۇدارىس زايسانوۆ (حامزە ەرزىن ۇلى - بۇرىنعى دەرەكتەردە اتى- ءجونى وسىلاي جازىلىپ كەلگەن) 1910 -جىلى شىعىس قازاقستان وبلىسىنىڭ زايسان اۋدانىندا دۇنيەگە كەلگەن. 1920- جىلدارى تاعدىر تالكەگىمەن موڭعولياعا قونىس اۋدارعان. 1932 -جىلى ورىنبوردىڭ ۇشقىشتار ۋچيليشەسىن بىتىرەدى. 1939 -جىلى جاپون باسقىنشىلارىنا قارسى كۇرەسىپ، ەرلىك كورسەتەدى.
1942 -جىلى م. زايسانوۆ موڭعوليانىڭ اسكەري اۋە كۇشتەرىنىڭ قولباسشىسى بولىپ تاعايىندالادى. 1943-1944 -جىلدارى قىتايدىڭ گوميندان اسكەرلەرىنە قارسى شايقاسقا قاتىسادى. 1944 - جىلى ءساۋىر ايىندا م. زايسانوۆقا اۆياتسيا گەنەرال- مايورى شەنى بەرىلدى. ول موڭعول جانە سوۆەت وردەندەرى مەن مەدالدارىمەن ماراپاتتالعان. 1967 -جىلى م. زايسانوۆ اۋىر سىرقاتتان كوز جۇمادى. ول ۇلانباتىر قالاسىندا جەرلەنگەن.
اۆتورى سادىق اكيجانوۆ
