دەسانت بولۋ ءۇشىن نە ىستەۋ كەرەك؟

نۇر-سۇلتان. قازاقپارات - دەسانت بولعىسى كەلەتىن جاس ەرتە دايىندالادى. شىنىعىپ، ەكران الدىنا كوپ ۋاقىت شەگەلەنبەي، جاقسى تاماقتانادى جانە وعان قويىلاتىن تالاپ تا مىقتى، دەپ حابارلايدى «التاي نيۋس».

«دەسانتۋرا، مەملەكەتتىك كۇزەت - اسكەري قىزمەتتىڭ ەليتاسى سانالادى. جىگىتتەردىڭ «بارعىسى» كەلەتىن جەرى وسى. ءبىراق وندا مەديتسينالىق، پسيحولوگيالىق تەكسەرىستەن ءوزى دە وتباسى مۇشەلەرى دە سۇرىنبەگەن جىگىتتىڭ سىرتتانى جىبەرىلەدى. ءيا، ءوزى جاراپ تۇرعان جىگىتتىڭ وتباسى مۇشەلەرى دە جان-جاقتى باقىلاۋدان وتەدى. دەسانتشىلار پاراشيۋتپەن سەكىرەدى، ادەتتەگى اسكەري قىزمەتپەن سالىستىرعاندا اناعۇرلىم كوپ جۇگىرەدى. فيزيكالىق اۋىر جاتتىعۋلارمەن قوسا پسيحولوگيالىق قىسىم قاتتى»، - دەيدى وبلىستىق قورعانىس ىستەرى جونىندەگى دەپارتامەنتتىڭ قىزمەتكەرى اينۇر ۋاليەۆا.

ءيا، وسى ەكى جەردە وتان الدىنداعى بورىشىن وتەگەن جاستاردىڭ بولەكشە ابىرويمەن ورالاتىنى انىق.

«وسى جولى ءبىزدىڭ وبلىستان مەملەكەتتىك كۇزەت قىزمەتىنە 23 جاس اتتاندى. ال جالپى كوكتەمگى شاقىرىلىمدا 1300 جاس سارباز ساپقا تۇرعىزىلىپ، ءار تاراپقا جونەلتىلدى»، - دەيدى اينۇر ۋاليەۆا.

ولاردى شىعارىپ سالۋ ءراسىمى وسكەمەندەگى «ەرتىس» مادەنيەت سارايىندا ءوتتى. شارا وتان قورعاۋشىلار مەيرامىنا ورايلاستىرىلعان ەدى.

«ساربازداردى شىعارىپ سالۋ بىزدە داستۇرگە اينالعان. مۇندا قارۋلى كۇشتەردىڭ ارداگەرلەرى، ينتەرناتسيوناليست جاۋىنگەرلەر، كۋرسانتتار جانە اسكەري-پاتريوتتىق ۇيىرمەلەردىڭ تاربيەلەنۋشىلەرى قاتىسادى. باستى ماقسات - جاستاردىڭ پاتريوتتىق سۇيىسپەنشىلىگىن وياتۋ. شارانى جەرگىلىكتى اتقارۋشى بيلىكپەن بىرلەسىپ ۇيىمداستىردىق»، - دەيدى دەپارتامەنتتىڭ باستىعى قايىربەك قايىرقانوۆ.