ەرلان قوشانوۆ ارداگەرلەردى كەلە جاتقان جەڭىس كۇنىمەن قۇتتىقتادى
«قىمباتتى ارداگەرلەر، سىزدەر بىزگە بەيبىت اسپان سىيلادىڭىزدار. سىزدەر وتان ءۇشىن، جارقىن بولاشاق ءۇشىن سوعىسىپ، جەڭىستى جاقىنداتقان قورعاۋشىلارىمىزسىزدار. وسى ءۇشىن سىزدەرگە ۇلكەن راحمەت! ءبىز سىزدەردىڭ ەرلىكتەرىڭىزدى ۇمىتپايمىز. ۇلى جەڭىس تۋرالى ەستەلىكتى ۇرپاقتان ۇرپاققا جەتكىزەتىن بولامىز»، - دەدى ايماق باسشىسى قۇتتىقتاۋ سوزىندە.
اكىم بيىل قاراعاندىلىق كەڭەس وداعىنىڭ باتىرى نۇركەن ءابدىروۆتىڭ تۋعانىنا 100 جىل تولعانىن اتاپ ءوتتى.
ارداگەرلەر ەستەلىكتەرىمەن ءبولىسىپ، جەرگىلىكتى بيلىككە كورسەتىپ جاتقان قامقورلىقتارى ءۇشىن العىستارىن ءبىلدىردى.
«مەن ورلوۆ جانە كۋرسك شايقاستارىندا كوپتەگەن قاقتىعىستارعا قاتىستىم. اۋىر جاراقات الدىم، ءبىراق گوسپيتالدە ەمدەلگەننەن كەيىن مايدانعا ورالدىم. 1945-جىلى جەڭىستەن كەيىن سولتۇستىك-شىعىس قىتاي مەن موڭعوليانى جاپوندىقتاردان ازات ەتۋگە قاتىستىم. ءبىزدىڭ باستان كەشكەنىمىزدى ەشكىمگە تىلەمەيمىز. اللا ونى بالالار مەن نەمەرەلەرىمىزگە كورسەتپەسىن دەگىم كەلەدى»، - دەدى 96 جاسار ارداگەر بۇركىت ەسجانوۆ.
ول 1942-جىلى 19 جاسىندا مايدانعا اتتانعان. بەسىنشى گۆارديالىق اتقىشتار ديۆيزياسىنىڭ قۇرامىندا شايقاسقان. 1948 -جىلى اسكەردەن بوساتىلدى. سوعىستان كەيىن ۇيلەنىپ، جارىمەن بىرگە 8 بالا تاربيەلەپ، ءوسىردى.
100 جاسار نينا سوروكينا جاس ۇرپاقپەن باقىتتى بولۋدىڭ سىرىمەن ءبولىستى. ونىڭ ايتۋىنشا، باقىتتىڭ ءۇش نەگىزگى قۇرامداس بولىگى بولادى: دەنساۋلىق، وتباسى جانە وتان. ول جاستاردى بەيبىت اسپاندى قادىرلەۋگە، سالاۋاتتى ءومىر سالتىن ۇستانۋعا جانە ءار كۇنگە قۋانۋعا، ءوز كەلەشەگىن بارىنشا جارقىن ەتۋ مۇمكىندىكتەرىن جىبەرىپ الماۋعا شاقىردى.
سالتاناتتى شارا مەرەكەلىك كونتسەرتپەن اياقتالدى. ارداگەرلەر الدىندا ارتىستەر سۇيىكتى اسكەري اندەردى شىرقادى.
بۇگىن قاراعاندى وبلىسىندا ۇلى وتان سوعىسىنىڭ 95 قاتىسۋشىسى مەن مۇگەدەكتەرى، 10 مىڭعا جۋىق تىل ەڭبەككەرلەرى تۇرادى. وسى جىلى مايدانگەرلەر جەڭىس كۇنىنە وراي 300 مىڭ تەڭگەدەن استام اقشالاي سىيلىقتارعا يە بولدى. ارداگەرلەرگە تەڭەستىرىلگەن ساناتتاعى تۇلعالارعا ءبىرجولعى كومەك 20 دان 100 مىڭ تەڭگەگە دەيىن بولادى.