13:56, 07 - مامىر 2019 | GMT +5
تۇركيادا ستامبۋل اكىمىن سايلاۋدىڭ ناتيجەسى جويىلدى
نۇر-سۇلتان. قازاقپارات - تۇركيانىڭ جوعارعى سايلاۋ كوميسسياسى ستامبۋل قالاسى اكىمىن سايلاۋ ناتيجەسىن جويىپ، قايتا داۋىس بەرۋ وتكىزۋ تۋرالى شەشىم شىعاردى.
سايلاۋ 23- ماۋسىمعا بەلگىلەندى. بۇل تۋرالى Anadolu اقپارات اگەنتتىگى حابارلادى.
ءساۋىردىڭ ورتاسىندا سايلاۋ كوميسسياسى ستامبۋل اكىمىن سايلاۋدا وپپوزيتسيا جاقتاعى حالىقتىق-رەسپۋبليكالىق پارتياسىنىڭ كانديداتى «ەكرەم يماموگلۋ جەڭىسكە جەتتى» دەپ حابارلاعان. بيلىكتەگى رەجەپ تايىپ ەردوعاننىڭ ادىلدىك جانە دامۋ پارتياسى 1994-جىلدان بەرى العاش رەت ستامبۋلداعى بيلىكتەن ايىرىلعان. كەيىن ەردوعاننىڭ جاقتاستارى سايلاۋدا زاڭ بۇزىلدى دەپ، داۋىس بەرۋ ناتيجەسىن جويۋدى تالاپ ەتكەن.
تۇركيادا 31- ناۋرىزدا مۋنيتسيپالدىق سايلاۋ وتكەن. بارلىعى 57 ميلليون ادام داۋىس بەرگەن. ستامبۋل اكىمىن سايلاۋدا ەكرەم يماموگلۋ بيلىك پارتياسىنىڭ كانديداتى بينالي يىلدىرىمنان باسىم تۇسكەنى حابارلانعان.