ەلوردادا اتى اڭىزعا اينالعان «قارا مايور» تۋرالى فيلم كورسەتىلدى

 نۇر- سۇلتان. قازاقپارات - بۇگىن ەلورداداعى ق ر قارۋلى كۇشتەرىنىڭ اسكەري تاريحي مۋزەيىندە اۋعان سوعىسىنىڭ اتى اڭىزعا اينالعان ارداگەرى بوريس كەرىمبايەۆ تۋرالى تۇسىرىلگەن دەرەكتى فيلمنىڭ كورسەتىلىمى ءوتتى، دەپ حابارلايدى قازاقپارات ءتىلشىسى.

 «ق ر تۇڭعىش پرەزيدەنتى - ەلباسى نۇرسۇلتان نازاربايەۆ ءوزىنىڭ «ۇلى دالانىڭ جەتى قىرى» اتتى باعدارلامالىق ماقالاسىندا: «حالىقتىڭ تاريحي تانىم- تۇيسىگىندە كينو ونەرى ەرەكشە ورىن الادى. ءبىزدىڭ داڭقتى باتىرلارىمىز تەك قانا قازاقستاندا عانا ەمەس، سونىمەن قاتار بۇكىل الەم بويىنشا ەلىكتەگى لايىق تۇلعالار» ، دەپ اتاپ ءوتتى. قازاقستاندىق كينەماتوگرافيستەردىڭ پولكوۆنيك بوريس توكەن ۇلى كەرىمبايەۆقا ارنالعان بۇگىنگى جوباسى وسى باعىتتا جاڭالىق بولۋى ءتيىس» ، - دەدى فيلم كورسەتىلىمى الدىندا ءسوز سويلەگەن قر قورعانىس ءمينيسترى نۇرلان ەرمەكبايەۆ.

سونىمەن قاتار، ول دەرەكتى فيلمدى تۇسىرۋگە اتسالىسقان رەجيسسەرلەرگە، سەناريشىلەرگە، پروديۋسەرلەرگە ريزاشىلىعىن ءبىلدىرىپ، بوريس توكەن ۇلى جايلى تىڭ مالىمەتتەر بەرگەن ونىڭ تۋعان- تۋىستارىنا، جورا- جولداستارىنا راحمەت ايتتى.

 فيلمدى ق ر مادەنيەت جانە سپورت ءمينيسترى ارىستانبەك مۇحامەدي ۇلى، ءماجىلىس دەپۋتاتتارى، قوعام قايراتكەرلەرى تاماشالادى.

  
 
 
 
 
 
 
 
 
 

اۋعان سوعىسىنىڭ ارداگەرى، ارنايى ماقساتتاعى 177-  جاساق كومانديرى بوريس كەرىمبايەۆتىڭ تاعدىرى جايىندا سىر شەرتەتىن فيلمدى ق ر مادەنيەت جانە سپورت مينيسترلىگىنىڭ تاپسىرىسىمەن «قازاقفيلم» كينو ستۋدياسى تۇسىرگەن. سەناري اۆتورلارى مەن رەجيسسەرلەرى: اسەت ەرنازاروۆ پەن عازيز نازاروۆ.