16:29, 06 - مامىر 2019 | GMT +5
گولوۆكيننىڭ جاڭا باپكەرى جاتتىعۋعا ەنگىزىلگەن وزگەرىستەر تۋرالى ايتتى
نۇر- سۇلتان. قازاقپارات - گەننادي گولوۆكيننىڭ جاڭا جاتتىقتىرۋشىسى دجوناتون بەنكس بوكسشىنىڭ ءستيلىن وزگەرتۋگە ارنالعان ءبىرقاتار جوسپارلارىمەن ءبولىستى، دەپ حابارلايدى Sports.kz.
بەنكسكە دەيىن گولوۆكين توعىز جىل ابەل سانچەسپەن بىرلەسىپ جۇمىس ىستەدى. 8 - ماۋسىم كۇنى نيۋ- يوركتە وتەتىن ستيۆ روللسپەن جەكپە- جەك 36 جاستاعى امەريكالىقتىڭ GGG- ءدىڭ جاتتىقتىرۋشىسى رەتىندەگى العاشقا ايقاسى بولماق.
«قازىر ءبىز ونىڭ رينگتەگى بەلسەندىلىگى ءۇشىن جۇمىس جاساپ جاتىرمىز. ءدال قازىرگى ۋاقىتتا بۇل ءبىزدىڭ نەگىزگى ماقساتىمىز. كوبىرەك سوققى بەرىپ، قارسىلاستى شارشاتۋ كەرەك. ءبىر شابۋىلعا عانا ەمەس، قاتارىنان بىرنەشە سوققىعا كۇش سالسا، قارسىلاستىڭ شارشى الاڭدا دەمالۋىنا ۋاقىت قالمايدى. راۋندار اراسىنداعى ءۇزىلىس قانا ونىڭ تىنىستاپ الۋىنا مۇمكىندىك بەرەدى. وسىلايشا قارسىلاسىڭىزدىڭ رينگتە ءوزىن قولايسىز سەزىنۋىنە جول اشاسىز» ، - دەدى دجوناتون بەنكس Fighthub TV گە بەرگەن سۇحباتىندا.