سۋعا باتقان قىزدى قۇتقارعان پوليتسەي پرەزيدەنت قولىنان وردەن الدى
«اسكەردى باسقارۋداعى ەڭبەگى مەن جاۋىنگەرلىك جاتتىعۋداعى جوعارى كورسەتكىشى ءۇشىن 1-دارەجەلى «داڭق» وردەنىمەن ق ر قارۋلى كۇشتەرىنىڭ باس شتابى باستىعىنىڭ ورىنباسارى ادىلبەك الدابەرگەنوۆ، 2-دەرەجەلى «داڭق» وردەنىمەن كونستيتۋتسيالىق قۇرىلىستى قورعاۋداعى قىزمەتى ءۇشىن الماتى وبلىس بويىنشا ق ر ۇلتتىق قاۋىپسىزدىك كوميتەتى دەپارتامەنتىنىڭ باستىعى ءسابيت قۇرماناليەۆ ماراپاتتالادى»، - دەدى پرەزيدەنت سالتاناتتى شارا بارىسىندا.
سونىمەن قاتار مەملەكەت باسشىسى سىبايلاس جەمقورلىقپەن جانە كولەگەيلى ەكونوميكامەن كۇرەستەگى جەتىستىستىكتەرى ءۇشىن اقمولا وبلىستىق سىبايلاس جەمقورلىققا قارسى ءىس- قيمىل دەپارتامەنتىنىڭ باسشىسى قۋانىش بەكباسوۆقا 2-دارەجەلى «ايبىن» وردەنىن تابىس ەتتى. مەملەكەتتىك شارالاردىڭ قاۋىپسىزدىگىن قامتاماسىز ەتۋدەگى ءمىنسىز قىزمەتى ءۇشىن ءدال وسىنداي وردەنمەن مەملەكەتتىك كۇزەت قىزمەتىنىڭ ينسپەكتورى ۆيكتور بالياسنيكوۆ ماراپاتتالدى.
«2-دارەجەلى «ايبىن» وردەنىنە اتىراۋ قالاسىنىڭ جول- پاترۋلدىك پوليتسياسىنىڭ ينسپەكتورى رۇستەمبەك سۇندەتوۆ لايىقتى دەپ تانىلدى. سۋعا باتىپ بارا جاتقان قىز بالانى قۇتقارىپ قالعان ازاماتتىڭ باتىلدىعى شىنايى ەرلىكتىڭ ۇلگىسى. «قۇرمەت» وردەنىمەن ق ر باس پروكۋراتۋراسى ۇكىمدەردىڭ زاڭدىلىعىن قادالاعاۋ قىزمەتى باستىعىنىڭ ورىنباسارى راديمحان دۋبايەۆا ماراپاتتالادى. ونىڭ باسشىلىعىمەن تۇرمە تۇرعىندارىن قىسقارتۋدىڭ 10 شاراسى اتتى الەۋمەتتىك ماڭىزى بار جوبا جۇزەگە اسىرىلدى»، - دەدى مەملەكەت باسشىسى.
ق. توقايەۆ جانقيارلىق ەرىك جاساپ، كامەلەتكە تولماعان بالانى جانە قاريانى ورتتەن امان الىپ شىققان ۇلتتىق گۆارديانىڭ ساربازى مەدەت بالابييەۆتى «ەرلىگى ءۇشىن» مەدالىمەن ماراپاتتادى.
اۆتور: مارلان جيەمباي
