اۋىل پارتياسىنىڭ كانديداتى رەسمي تۇردە تىركەلدى

كوميسسيا مۇشەسى اقىلبەك يحدانوۆتىڭ ايتۋىنشا، وتكەن ايدىڭ سوڭىندا «اۋىل» حالىقتىق- دەموكراتيالىق پارتياسى تولەۋتاي ساتاي ۇلى راحىمبەكوۆتى ق ر پرەزيدەنتتىگىنە كانديتات رەتىندە ۇسىندى. وسىعان بايلانىستى زاڭ بويىنشا ۇمىتكەردىڭ بارلىق قۇجاتتارى تاپسىرىلدى. لينگۆيستيكالىق كوميسسيا ت. راحىمبەكوۆتىڭ مەملەكەتتىك ءتىلدى ەركىن مەڭگەرگەنىن راستادى. ال ورتالىق سايلاۋ كوميسسياسى ونى زاڭنىڭ بارلىق تالاپتارىنا ساي كەلەدى دەپ تانىدى.

«پرەزيدەنتتىككە كانديدات تولەۋتاي راحىمبەكوۆتىڭ كىرىستەرى مەن مۇلكىنە قاتىستى دەكلاراتسيانى تاپسىرعانى تۋرالى مەملەكەتتىك كىرىستەر ورگانىنىڭ انىقتاماسى بار. ونى تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندى بەرىلدى. بۇدان بولەك، اۋماقتىق سايلاۋ كوميسسيالارىنىڭ پرەزيدەنتتىككە كانديدات تولەۋتاي ساتاي ۇلى راحىمبەكوۆتى قولداپ جينالعان ازاماتتاردىڭ قولدارىن تەكسەرۋ ناتيجەلەرى تۋرالى حاتتامالار ۇسىنىلدى. وسى حاتتامالارعا سايكەس، قازاقستاننىڭ بارلىق وڭىرلەرىنەن  122309 ازاماتتىڭ قولى جينالدى. سونىڭ  120754- ءتى راستالدى. ال كانديدات جيناعان قولداردىڭ قاجەتتى سانى كەمىندە  118140- ءتى قۇرايدى»، - دەپ اتاپ كورسەتتى ا. يحدانوۆ.

ورتالىق سايلاۋ كوميسسياسىنىڭ قاۋلىسىنا سايكەس، تولەۋتاي راحىمبەكوۆ 2019 -جىلعى 9 - ماۋسىمعا تاعايىندالعان ق ر پرەزيدەنتىنىڭ كەزەكتەن تىس سايلاۋىنا كانديدات رەتىندە رەسمي تۇردە تىركەلدى. بۇگىن وعان كانديداتتىڭ كۋالىگى تاپسىرىلدى.

اۆتور: ارمان اسقاروۆ