الەم چەمپيوناتى توعىزقۇمالاقتىڭ وزگە ەلدەردە دامىپ كەلە جاتقانىن كورسەتتى - اينۇر جاقاپبايەۆا
اتالعان الەمدىك دودادا كىمدەردىڭ توپ جارعانىن جازعان ەدىك. بۇگىن تۇركيا تورىندە وتكەن دودا تۋرالى قازاقپارات تىلشىسىنە ازيا چەمپيونى، حالىقارالىق دارەجەدەگى سپورت شەبەرى، قازاقستانعا ەڭبەك سىڭىرگەن جاتتىقتىرۋشى، توعىزقۇمالاقتان قازاقستاننىڭ ۇلتتىق قۇراماسىنىڭ باس جاتتىقتىرۋشىسى اينۇر جاقاپبايەۆا ايتىپ بەردى.
- ءتول ويىنىمىز توعىزقۇمالاقتان الەم بىرىنشىلىگىن تۇرىك جۇرتى قانداي دەڭگەيدە ۇيىمداستىرا الدى؟
- وتە جوعارى دەڭگەيدە ءوتتى. ءار ەلدەن جارىسقا كەلگەن ويىنشىلاردى جاقسىلاپ كۇتىپ الىپ، شىعارىپ سالدى. جارىستىڭ سالتاناتتى اشىلۋى مەن جابىلۋ راسىمىندە وتە جوعارى دەڭگەيدە ۇيىمداستىرا ءبىلدى. ءبىر سوزبەن ايتقاندا بارلىعى تالاپقا ساي بولدى. بۇل جەردە تەك توعىزقۇمالاق ويىنى ەمەس، مانگالا ويىنىنان دا الەم چەمپيوناتى ءوتتى.
- جالپى الەم بىرىنشىلىگىنە قانشا ەلدەن سپورتشى كەلدى؟
- جالپى 16 مەملەكەتتەن 100 گە جۋىق سپورتشى قاتىستى. العاشىندا بۇل بىرىنشىلىككە گەرمانيا ويىنشىلارى دا قاتىسۋعا ءوتىنىم بەرگەن بولاتىن. وكىنىشكە قاراي جارىس باستالار ساتتە ولار بەلگىلى ءبىر سەبەپتەرگە بايلانىستى باس تارتىپ، جارىسقا قاتىسقان جوق. گەرمانيانى ارنايى اتاپ وتىرعان سەبەبىم - ولاردا توعىزقۇمالاقتان الەم چەمپيوناتىنىڭ قولا جۇلدەگەرى مەن ەۋروپا بىرىنشىلىگىندە توپ جارعان مىقتى ويىنشىلار بولعان. ولار كەلگەندە ويىن كورىگى تىپتەن قىزا تۇسەر مە ەدى دەپ ويلادىق.
- وزگە ەلدەردەن كەلگەن ويىنشىلاردان بيىل كىمدەر كوزگە ءتۇستى؟
- بيىل وزگە ەلدەردەن كوزگە تۇسكەن سپورتشىلار اراسىنان ەڭ ءبىرىنشى چەحيالىق پاۆەل نوگا دەگەن ازاماتتى اتار ەدىم. ول توعىزقۇمالاقتىڭ كلاسسيكا تۇرىنەن سوڭعى تۋردا ءتورت دۇركىن الەم چەمپيونى اتانعان عالىمجان تەمىربايەۆتان ۇتىلىپ قالدى. ەگەر سوڭعى تۋردا ۇتقاندا الەم چەمپيونى اتانار ەدى. سوسىن موڭعوليادان كەلگەن ويىنشىلاردا وتە جوعارى دەڭگەيدە ونەر كورسەتتى. جارىستىڭ ەكى تۇرىنەن اردابۇلان شىنداۋلەت پەن ەرمانات قۇليبەك قولا مەدال جەڭىپ الدى. سونداي-اق، توعىزقۇمالاقتىڭ بليتس تۇرىنەن قىرعىزستاندىق جاس ويىنشى مارليس دۋۋلاتبەكوۆ تۇڭعىش رەت الەم چەمپيونى اتاندى. ول 11-سىنىپتىڭ وقۋشىسى. مىنە، بۇل ءتول ويىنىمىزدىڭ وزگە ەلدەردە دە جوعارى دەڭگەيدە دامىپ كەلە جاتقانىنىڭ بەلگىسى.
- ال ءوزىمىزدىڭ ويىنشىلاردان كىمدەردى اتاپ وتەر ەدىڭىز؟ بولاشاعىنان ءۇمىت كۇتەتىن جاستاردان كىمدەردى بايقاي الدىڭىز؟
- ءبىزدىڭ ۇكىلەپ اپارعان بارلىق ويىنشىلارىمىز جارادى. بۇرىن الەمنىڭ 8 دۇركىن چەمپيونى اسەل داليەۆا 9 دۇركىن چەمپيون اتانسا، ەرلەر اراسىنداعى سپورتشىلارىمىزدا كەزەكتى چەمپيوندىق اتاقتارىنا قول جەتكىزدى. ال، بولاشاعىنان زور ءۇمىت كۇتۋگە بولاتىن جاس سپورتشىلار تۋرالى ايتار بولسام تۇركىستان وبىلىسىنىڭ ويىنشىسى لينا كاريموۆا استانادا وتكەن الەم چەمپيوناتىندا ءبىر رەت توپ جارسا، مىنە، تۇركيادا ەكىنشى رەت باس جۇلدەنى جەڭىپ الدى. تاعى ءبىر اقتوبەلىك جاس ويىنشىمىز بيىل 11-سىنىپتا وقىپ جاتقان گۇلجانات الدابەرگەنوۆا وتكەن جىلى ازيا چەمپيونى اتانسا، مىنە بيىل توعىزقۇمالاقتان الەم چەمپيونى دەگەن اتقا يە بولدى. مىنە، بۇل بولاشاقتا توعىزقۇمالاقتان تالاي الەم چەمپيوندارى شىعاتىنىن كورسەتىپ وتىر.
- ەندى، الداعى جوسپارلارىڭىزدى بولىسە كەتسەڭىز؟
- وسى الەم بىرىنشىلىگى اياسىندا دۇنيەجۇزىلىك توعىزقۇمالاق قاۋىمداستىعىنىڭ وتىرىسى ءوتتى. وندا كەلەسى، ياعني 2020-جىلى توعىزقۇمالاقتان ازيا چەمپيوناتى مەن ەۋروپا بىرىنشىلىگىن قاي ەلدە وتكىزەتىنىمىز بەلگىلى بولدى. ازيا چەمپيوناتىن وزبەكستاندا وتكىزسەك، ەۋروپا بىرىنشىلىگى ماجارستاندا وتەتىن بولىپ بەلگىلەندى. ەندى سول جارىستارعا تىڭعىلىقتى دايىندالامىز.
- اڭگىمەڭىزگە راحمەت!
اۆتور: كۇنسۇلتان وتارباي