ۇلتتىق سپورتتان ەل چەمپيوناتىنىڭ وتەتىن ورىنى تارازعا اۋىستى
ق ر ۇلتتىق سپورت قاۋىمداستىعى حابارلاعانداي رەسپۋبليكانىڭ باستى باسەكەسى 19-26- مامىر ارالىعىندا وتپەك.
نەگىزىندە، ەلىشىلىك چەمپيونات جىل باسىندا بەكىتىلگەن جوسپار بويىنشا الماتى قالاسىندا ۇيىمداستىرىلۋى ءتيىس بولاتىن. ءبىراق، ءتۇرلى سەبەپتەرگە بايلانىستى جۋىقتا ەرەسەكتەر چەمپيوناتىنىڭ 19-26- مامىردا تاراز قالاسىندا وتكىزىلەتىنى انىقتالدى.
ق ر مادەنيەت جانە سپورت مينيسترلىگى بەكىتكەن «2019-جىلعى بۇقارالىق-سپورتتىق رەسپۋبليكالىق جانە حالىقارالىق جارىستاردىڭ كۇنتىزبەسىنە» سايكەس، ق ر ۇلتتىق سپورت قاۋىمداستىعىنىڭ ۇيىمداستىرۋىمەن وتەتىن بيىلعى چەمپيوناتتىڭ ەرەكشەلىگى - ەلىمىزدىڭ بارلىق وڭىرىندەگى 17 كوماندا تولىق قاتىسپاقشى. باسەكە وتەتىن ورىن - جامبىل وبلىسى، جامبىل اۋدانى، بەكتوبە اۋىلىنداعى يپپودروم. مەكەنجايى وبلىسقا قاراعانىمەن، بۇل اتشابار تاراز قالاسىنىڭ ىرگەسىندە ورنالاسقان.
سونىمەن، كوكپاردان - ХІХ، اۋدارىسپاقتان - ХІХ، تەڭگە ىلۋدەن - ХІІI، جامبى اتۋدان - V رەت وتكىزىلەتىن ەرەسەكتەر اراسىنداعى قازاقستان چەمپيوناتىنا دايارلىق قازىرگى كەزدە قىزۋ جۇرگىزىلۋدە.
ۇلتتىق سپورتتىڭ ەسەپشوتىن قاققان مامانداردىڭ بولجاۋىنشا، اسىرەسە، بيىلعى ەلىشىلىك جارىستا كوكپارشىلار باسەكەسى وتە تارتىستى وتۋگە ءتيىس. سەبەبى، قاراشا ايىندا وزبەكستاندا كوماندالىق كوكپاردان الەم چەمپيوناتى ۇيىمداستىرىلادى. بيىلعى قازاقستان چەمپيوناتىندا جەڭىمپاز اتانىپ، كوزگە تۇسكەن كوكپارشىلاردان وسى الەم چەمپيوناتىندا ەل نامىسىن قورعايتىن ۇلتتىق قۇراما كوماندا جاساقتالماق.
سوندىقتان، كوكپاردان بىرنەشە جىلدا ءبىر رەت وتەتىن الەم چەمپيوناتىنا جولداما الۋ ءۇشىن كوكپارشىلارىمىز ەلىشىلىك چەمپيوناتتا ەرەكشە ويىن ورنەگىن كورسەتەدى دەپ كۇتىلۋدە.
جانكۇيەر جادىنا سالىپ وتسەك، كوكپاردان قازاقستان ۇلتتىق قۇراما كومانداسى 8 مەملەكەت كومانداسى قاتىسقان ازيا چەمپيوناتىندا (2013)، 11 مەملەكەت كومانداسى قاتىسقان الەم چەمپيوناتىندا (2017) باس جۇلدەنى جەڭىپ العان. سونداي-اق، قازىرگى كەزگە دەيىن قازاقستان ۇلتتىق قۇراما كومانداسى كوكپاردان ۇيىمداستىرىلعان حالىقارالىق جارىسقا توعىز رەت قاتىسىپ، التى دۇركىن چەمپيون اتاندى.
اۆتور: كۇنسۇلتان وتارباي