قاراعاندىدا ۇلتتىق سپورت تۇرلەرىنەن جارىس ءوتتى
اكسيا وتان قورعاۋشى جانە جەڭىس كۇنى مەرەكەلەرىنە ارنالعان. ماقساتى - قازاق ۇلتتىق ويىندارى بارىسىنداعى ەرەكشە كورىنىستى جانە قىزۋ تارتىستى كورسەتۋ.
وبلىستىڭ جاس سپورتشىلارى توعىزقۇمالاق پەن قازاق كۇرەسىنەن جارىستى. ال بالالار «كوڭىلدى ستارتتار» ەستافەتاسىنا قاتىستى. ولار ءتىرى لاقتى اۋلاپ، جەردەن ساداق اتىپ، اسىق وينادى.
ايتا كەتەيىك، قالالىق جارىستار ات سپورتى بازاسىندا ءوتتى. دوداعا قاتىسۋشىلار جامبى اتۋ، تەڭگە الۋ، اۋدارىسپاق سەكىلدى كۇردەلى جانە ويىن-ساۋىق سپورت تۇرلەرى بويىنشا ءوزارا باق تالاستىردى. «قايرات» ۇلتتىق جانە ات سپورتى تۇرلەرى مەكتەبىنىڭ تاربيەلەنۋشىلەرى مەن اۋلا كلۋبتارى مۇشەلەرىنىڭ الدىندا سپورت شەبەرلەرى مەن چەمپيوندار ونەر كورسەتتى.
«مەن بالا كەزىمنەن اتقا ءمىنىپ، اۋىلدا وسكەنمىن. 2014-جىلى تارازعا مونعوليادان باپكەرلەر كەلدى. مەن وعان ارنايى بارىپ، شەبەرلىك كۋرسىن الدىم. وتكەن جىلى ەلوردادا وتكەن حالىقارالىق تۋرنيردە ءبىرىنشى ورىنعا يە بولدىم. ماجارستاندا وتكەن جارىستا جەڭىسكە جەتتىم. قىرعىزستانداعى كوشپەندىلەر ويىندارىندا ءبىز ۇزدىكتەردىڭ قاتارىندا بولدىق»، - دەدى سپورت شەبەرى، جامبى اتۋ بويىنشا قازاقستان چەمپيونى تالعات وماربايەۆ.
قاراعاندىدا وتكەن فەستيۆالگە 300 گە جۋىق سپورتشى قاتىستى.
