اۋەزوۆ تەاترى رەسەيدەگى بايقاۋدا ۇزدىك دەپ تانىلدى

نۇر-سۇلتان. قازاقپارات - مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى داعىستان رەسپۋبليكاسىندا وتكەن «كاسپي جاعالاۋى مەملەكەتتەرىنىڭ ۇلتتىق تەاترلارى» اراسىنداعى فەستيۆالدە باس جۇلدەنى قانجىعاسىنا بايلادى، دەپ حابارلايدى قازاقپارات ءتىلشىسى.

ماحاچكالا قالاسىندا وتكەن فەستيۆالدە قازاق تەاترى «سۇيىكتى مەنىڭ اعاتايىم» سپەكتاكلىن ۇسىندى.

مادەنيەت جانە سپورت مينيسترلىگىنەن حابارلاعانداي، رەسەيدەگى تەاتر جىلىن وتكىزۋ اياسىندا جۇزەگە اسىرىلعان شارانى داعىستاننىڭ تەاتر قايراتكەرلەرى وداعى ۇيىمداستىرعان. فەستيۆال بۇل وڭىردە العاش رەت ءوتتى. وعان 18 ۇلتتىق تەاتر قاتىستى.

«ولاردىڭ قاتارىندا قازاقستان، ازەربايجان، تاتارستان، سولتۇستىك وسەتيا، قاباردى-بالقار، قاراشاي-چەركەس، ينگۋشەتيا، قالماقيا، شەشەنستان، داعىستان ۇجىمدارى بار. قازىلار القاسى قاتىسۋشىلاردىڭ بارلىعىنا العىسىن ءبىلدىرىپ، جاقسى نە جامان دەگەن باعا بەرمەدى. تەك، نوعاي مەملەكەتتىك دراما تەاترىنىڭ «لاۆينا» قويىلىمى مەن م. اۋەزوۆ اتىنداعى قازاق مەملەكەتتىك اكدەميالىق دراما تەاترىنىڭ «سۇيىكتى مەنىڭ اعاتايىم» («دياديا ۆانيا») سپەكتاكلى تۋرالى وڭ پىكىرلەرىن جەتكىزدى»، - دەلىنگەن حابارلامادا.

فەستيۆال ناتيجەسىندە «ۇلكەن فورماتتاعى ۇزدىك سپەكتاكل» اتالىمىندا باس جۇلدەگە «سۇيىكتى مەنىڭ اعاتايىم» سپەكتاكلى لايىقتى دەپ تانىلسا، «ۇزدىك ايەل ادام بەينەسى» - جانەل ماقاجان جانە «ۇزدىك سەناگرافيا» اتالىمى بويىنشا - تامارا وكاحيان جەڭىمپاز اتاندى.