گۇلشارا ءابدىقالىقوۆا ەلورداداعى كوپبالالى انالارمەن كەزدەستى
سونىمەن قاتار، شاراعا نۇر-سۇلتان قالاسىنىڭ اكىمى باقىت سۇلتانوۆ، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ، ءبىلىم جانە عىلىم ءمينيسترى كۇلاش ءشامشيدينوۆا، دەنساۋلىق ساقتاۋ ءمينيسترى ەلجان ءبىرتانوۆ قاتىستى.
«ۇكىمەت مۇشەلەرىنەن قۇرالعان ۇلكەن توپ بارلىق وڭىرلەردە بولىپ، تۇرعىندارمەن كەزدەسۋلەر ءوتتى. وسى ورايدا كوپبالالى انالارمەن، جۇمىس بەرۋشىلەرمەن جۇزدەسىپ، الەۋمەتتىك جاۋاپكەرشىلىك جانە كوپبالالى وتباسىلارعا كومەكتەسۋ ماسەلەلەرى قارالدى. جالپى العاندا، وڭىرلەردەگى 156 ەلدى مەكەندە 30 مىڭعا جۋىق اداممەن كەزدەستىك. 262 ۇلكەن كەزدەسۋ بولدى، سونداي- اق 276 ازاماتتى ءبىز جەكە قابىلدادىق جانە 72 از قامتىلعان وتباسىعا باردىق»، - دەدى ۇكىمەت باسشىسىنىڭ ورىنباسارى.
وسى ورايدا گ. ءابدىقالىقوۆا اتالعان كەزدەسۋلەردەن كەيىن الەۋمەتتىك قامقورلىق باعدارلاماسى اياسىنداعى تولەمدەرگە بايلانىستى كەيبىر پروبلەمالار دا انىقتالعانىن اتاپ ءوتتى. بۇل تۇرعىدا ءتيىستى شەشىمدەر ىسكە اسىرىلدى.
ايتا كەتەيىك، ەلباسى نۇرسۇلتان نازاربايەۆتىڭ تاپسىرماسى بويىنشا ەلىمىزدە جاڭا الەۋمەتتىك ساياسات جۇزەگە اسىرىلۋدا. نەگىزگى مىندەت - ءومىر ءسۇرۋ ساپاسىن جاقسارتۋ جانە ازاماتتاردىڭ ءال- اۋقاتىن ارتتىرۋ.
بۇگىنگى كۇنى ەلوردادا 10,1 مىڭ كوپبالالى انالار بار (4,4 مىڭ كوپ بالالى انا «التىن القا» جانە «كۇمىس القامەن» ماراپاتتالعان) ونىڭ 3,5 مىڭنان استامى از قامتىلعان.
تاراتىلعان مالىمەتتەرگە قاراعاندا، ەلوردا اكىمدىگىندە كوپبالالى انالارعا الەۋمەتتىك كومەك كورسەتۋدىڭ 13 كەشەندى شاراسى ازىرلەنىپ، ىسكە قوسىلدى. وسىلايشا، اعىمداعى بيۋدجەتتەن الەۋمەتتىك كومەك كورسەتۋ ءۇشىن 5,6 ميلليارد تەڭگە ءبولىنىپ، الداعى بيۋدجەتتى ناقتىلاۋ كەزىندە 2,4 ميلليارد تەڭگە كولەمىندە قوسىمشا قارجى قاراستىرىلاتىن بولادى.
الەۋمەتتىك شارالار اۋقىمىندا كوپبالالى وتباسىلارعا جانە تۇرعىن ۇيمەن قامتاماسىز ەتىلمەگەن مۇگەدەك بالالارى بار وتباسىلارعا سەرتيفيكات بەرۋ مۇمكىندىگى قاراستىرىلۋدا. بۇگىنگى كۇنى بيۋدجەتتىك ۇيىمدار قىزمەتكەرلەرىنە ارنالعان تۇرعىن ءۇي سەرتيفيكاتتارى تولەنىپ، ناۋرىز مەرەكەسىنە وراي قۇنى 1 ميلليون تەڭگە بولاتىن 2000 سەرتيفيكاتتىڭ 143 ى بەرىلدى.
كەزدەسۋ بارىسىندا كوپبالالى جانە از قامتىلعان وتباسىلارعا مەملەكەتتىك الەۋمەتتىك كومەك تۋرالى كوپبالالى انالاردىڭ وكىلدەرى ءوز پىكىرلەرىمەن ءبولىستى.
ءوز كەزەگىندە ق ر پرەمەر-ءمينيسترىنىڭ ورىنباسارى مەملەكەتتىك ورگانداردىڭ باسشىلارىنا ءبىرقاتار تاپسىرمالار بەردى.