ارمەنيادا قازاق كۇرەسىنەن العاشقى اشىق چەمپيونات ءوتتى
«Qazaq kuresi» حالىقارالىق فەدەراتسياسىنىڭ قولداۋىمەن ۇيىمداستىرىلعان جارىسقا ەلدىڭ بارلىق وڭىرىنەن 95 سپورتشى قاتىستى.
«قازاقستان بارىسىنىڭ» العاشقى جەڭىمپازى، «Qazaq kuresi» حالىقارالىق فەدەراتسياسىنىڭ باس حاتشىسىنىڭ كەڭەسشىسى ۇلان رىسقۇلدىڭ ايتۋىنشا، فەدەراتسيا 2019 -جىل باستالعالى ءتۇرلى ەلدەردە 10 ۇلتتىق چەمپيونات وتكىزدى.
«Qazaq kuresi» حالىقارالىق فەدەراتسياسى قۇرىلعالى بەرى ەكى جىل ءوتتى. فەدەراتسيا پرەزيدەنتى، ق ر ەنەرگەتيكا ءمينيسترى قانات بوزىمبايەۆتىڭ باسشىلىعىمەن وسى ۋاقىتتا كوپتەگەن جۇمىستار اتقارىلدى. ەۋروپا مەن ازيانىڭ 28 ەلىندە قازاق كۇرەسىنەن ۇلتتىق فەدەراتسيالار قۇرىلدى، ۇلتتىق چەمپيوناتتار وتكىزىلۋدە. بيىلعى ماۋسىم ايىندا پولشانىڭ ۆروتسلاۆ قالاسىندا ەۋروپانىڭ Ⅱچەمپيوناتىن وتكىزەمىز. وعان 20-دان استام ەلدەن 100-گە جۋىق سپورتشى قاتىساتىنى كۇتىلۋدە. ارمەنيانىڭ العاشقى چەمپيوناتىنا كەلسەك، وعان تاجىريبەلى سپورتشىلار قاتىستى. جارىس جوعارى دەڭگەيدە ءوتتى»، - دەدى ۇلان رىسقۇل.
ارمەنيانىڭ Qazaq kuresi فەدەراتسياسىنىڭ پرەزيدەنتى داۆيد حيتارياننىڭ پىكىرىنشە، قازاق كۇرەسىنىڭ الەمدىك دەڭگەيدە كەلەشەگى زور. ونىڭ سوزىنشە، ارمەنيالىق سپورتشىلار كۇرەستىڭ اتالمىش تۇرىنە ۇلكەن قىزىعۋشىلىق ءبىلدىرىپ وتىر. بۇعان تۇڭعىش ۇلتتىق چەمپيوناتقا قاتىسۋشىلاردىڭ سانى دالەل.
«ۇسىنىس تۇسكەن بويدا ارمەنيادا Qazaq kuresi ۇلتتىق فەدەراتسياسىن قۇرۋعا، جەرگىلىكتى سپورتشىلارعا اتالمىش كۇرەس ءتۇرىنىڭ قىر- سىرىن ۇيرەتۋگە كىرىسىپ كەتتىم. سپورتشىلارىمىز ۇلكەن قىزىعۋشىلىق بىلدىرگەنىن اتاپ وتكىم كەلەدى. ارمەنيانىڭ العاشقى چەمپيوناتىنا 95 پالۋان قاتىسىپ وتىر. سالىستىرۋ ءۇشىن ايتا كەتەيىن، سامبودان، دزيۋدودان نەمەسە وزگە چەمپيوناتتارعا ءداستۇرلى تۇردە 60-70 سپورتشى قاتىسادى. قازاق كۇرەسىنىڭ الەمدىك دەڭگەيدە ۇلكەن كەلەشەگى بار. مەنىڭشە، Qazaq kuresi حالىقارالىق فەدەراتسياسى جۇرگىزىپ وتىرعان جۇمىستارعا قاراپ، قازاق كۇرەسى ۋاقىت وتە كەلە وليمپيادالىق سپورت تۇرىنە اينالارىنا بارلىق مۇمكىندىك بار»، - دەدى داۆيد حيتاريان.
جارىس ناتيجەسى بويىنشا پولشاداعى ەۋروپا چەمپيوناتىندا ارمەنيا نامىسىن قورعايتىن ۇلتتىق قۇراما جاساقتالاتىن بولادى.
اۆتورى ازامات الماعانبەتوۆ