پاۆلودارعا كوشىپ كەلگەن قانداستارىمىز مەرەكەلىك شارا وتكىزدى
ەلباسى نۇرسۇلتان ءابىش ۇلى نازاربايەۆتىڭ «ۇلى دالانىڭ جەتى قىرى» اتتى ماقالاسى اياسىندا ۇيىمداستىرىلعان وبلىستىق ونەر كەرۋەنىن ولگينو اۋىلىنداعى قانداستارىمىز ەرەكشە قۇرمەتپەن كۇتىپ الدى.
شارا اياسىندا، جۇرتشىلىققا قازاقتىڭ ۇلتتىق تاعامدارى ۇسىنىلىپ، ايتىس، قىز قۋۋ، قازاق كۇرەسى سەكىلدى ۇلتتىق ونەرلەرىمىز كورسەتىلدى.
«سوڭعى جىلدارى بۇل اۋىلعا شەتەلدەن كوشىپ كەلگەن اعايىندارىمىز كوپتەپ قونىستانا باستادى. قانداستارىمىز كەلگەلى اۋىلىمىزدا قازاقىلىق تا قانات جايا باستادى. ونەر كەرۋەنىنىڭ وسىندا ات باسىن تىرەۋىنىڭ ءبىر سەبەبى دە وسى. اق جاۋلىق تاعىپ، كيمەشەك كيگەن اپالارىمىز جاس ۇرپاققا ۇلتتىق تاربيەنىڭ ەرەكشە ۇلگىسىن كورسەتتى. ەڭ اۋەلى الىستان كەلگەن قوناقتاردىڭ الدىنان قىمىز الىپ شىعىپ، كۇتىپ الدى. سونداي-اق، اتا-اجەلەرىمىز ۇمىتىلىپ بارا جاتقان بي تۇرلەرىن بيلەپ، ەلدى قۋانىشقا بولەدى. بۇنداي مادەني شارالار جۇرتشىلىققا وسىنداعى قونىستانعان قانداستارىمىزدىڭ جاي- كۇيىنەن حاباردار ەتىپ، كوشىپ كەلگىسى كەلەتىن وتانداستارىمىزعا جول اشادى دەپ ويلايمىن»، - دەيدى اۋىلدىق مادەنيەت ءۇيىنىڭ ديرەكتورى مادينا قابدىل قىزى.
اۆتور: ريزابەك نۇسىپبەك ۇلى