ارىستانبەك مۇحامەدي ۇلى: ماسكەۋ فەستيۆالىندەگى جەڭىس - ءبىزدىڭ ونەر سالاسى ءۇشىن جارقىن وقيعا
بۇل تۋرالى مينيسترلىكتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
كەزدەسۋ بارىسىندا ارىستانبەك مۇحامەدي ۇلى فيلم رەجيسسەرى فارحات ءشارىپوۆتى حالىقارالىق ماسكەۋ كينوفەستيۆالىندەگى جەڭىسىمەن قۇتتىقتادى.
«بۇل - ءبىزدىڭ ونەر سالاسى ءۇشىن، جالپى العاندا قازاقستان ءۇشىن جارقىن وقيعا. حالىقارالىق ماسكەۋ كينوفەستيۆالى - تاريحى باي، الەمدەگى ەڭ ەسكى فەستيۆالدەردىڭ ءبىرى ءارى جىل وتكەن سايىن تانىمالدىلىققا يە بولىپ كەلە جاتىر» - دەپ اتاپ ءوتتى مينيستر.
كەزدەسۋ بارىسىندا فارحات ءشارىپوۆ مادەنيەت جانە سپورت مينيسترلىگىنە العىس ءبىلدىرىپ، جاقىندا وتكەن كينوفەستيۆال جايلى اسەرىمەن ءبولىستى. سونداي- اق، الداعى جوسپارلارى تۋرالى ءسوز قوزعادى.
ەستەرىڭىزگە سالساق، رەجيسسەر فارحات ءشارىپوۆتىڭ «تۇلعالىق ءوسۋ ترەنينگى» فيلمى ماسكەۋ كينوفەستيۆالىندە گران- پريگە يە بولعان ەدى. كارتينانى ق ر مادەنيەت جانە سپورت مينيسترلىگىنىڭ تاپسىرىسىمەن ش. ايمانوۆ اتىنداعى «قازاقفيلم» كينوستۋدياسى تۇسىرگەن. فيلمنىڭ ستسەناريى دانيار سۇگىرالينوۆتىڭ «كيرپيچي 2.0» رومانىنىڭ نەگىزىندە جازىلعان. «ۇزدىك فيلم» نوميناتسياسىنداعى «التىن گەورگييدى» شارىپوۆكە حالىقارالىق قازىلار القاسىنىڭ ءتوراعاسى، تانىمال كورەيالىق رەجيسسەر كيم كي دۋك تابىستادى.
الەۋمەتتىك دراما قىرىق جاسقا كەلگەن، ورتا جاس كۇيزەلىسىن كەشىپ جۇرگەن بانك قىزمەتكەرى قانات تۋرالى باياندايدى. بىردە قانات تۇلعالىق قالىپتاسۋ، كوشباسشىلىق قاسيەتتەردى دامىتۋ ترەنينگىنە بارادى. كوۋچ- ترەنەر جەتىستىككە قالاي جەتۋ كەرەكتىگىن جانە كوشباسشى بولا ءبىلۋدىڭ ادىستەرىن ايتادى. كوشباسشى بولۋدىڭ قۇپيالارىن بويىنا سىڭىرە كەلە، قانات ءوزىن جانە ومىرگە دەگەن كوزقاراسىن وزگەرتۋگە بەكىنەدى.
«فيلمنىڭ جارىققا شىعۋىنا ىقپال ەتكەن بارشا ادامعا العىس ايتامىن. الدىمەن وتباسىما مىڭ العىس. سول سەبەپتى بۇل جەڭىسىمدى اكەمە ارنايمىن. ال فەستيۆال ۇيىمداستىرۋشىلارى مەن كورەرمەندەرىنە كوپ راحمەت» ، - دەدى محكف لاۋرەاتى فارحات ءشارىپوۆ اعىنان جارىلىپ.
فيلمنىڭ الەمدىك تۇساۋكەسەرى 23- پۋسان حالىقارالىق كينوفەستيۆالىندە وتكەن. كارتينانىڭ قورجىنىندا بۇدان باسقا تاعى ەكى بىردەي جۇلدە بار - 14- حالىقارالىق شاكەن ايمانوۆ كينوفەستيۆالىندەگى قازىلار القاسىنىڭ ارنايى جۇلدەسى جانە نەتپاك جۇلدەسى.