وسكەمەندە «التايدان ۇشقان اقيىققا» ارنالعان ەسكەرتكىش ورناتىلادى

نۇر- سۇلتان. قازاقپارات - وسكەمەندە قازاقتان شىققان تۇڭعىش اسكەري ۇشقىش جاقىپبەك مالدىبايەۆقا ەسكەرتكىش قويىلادى، دەپ حابارلايدى قازاقپارات ءتىلشىسى.

قالا اكىمىنىڭ باسپا ءسوز حاتشىسى الىبەك تۇرسىمبەتوۆتىڭ ايتۋىنشا، باتىر ەسكەرتكىشىن ورناتۋ جۇمىستارى بيىل جازدا قولعا الىنباق. وسكەمەننىڭ ىرگەسىندەگى ابلاكەت ىقشام اۋدانىندا ۇشقىشتىڭ اتىندا ۇلكەن كوشە بار. ەسكەرتكىش سول كوشەنىڭ باسىنا، ۇلكەن جارتاستىڭ ۇستىندەگى كورنەكى ورىنعا قويىلماق. اتالمىش كوشەنىڭ بويىنا بۇعان دەيىن ۇرپاقتارى سىنتاس ورناتقان بولاتىن. ول ەسكەرتكىش جىلدار بويى ۆاندالداردىڭ شابۋىلىنا ۇشىراپ، بىرنەشە رەت جوندەۋ كورگەن. قالا اكىمى جاقسىلىق ومار اتالمىش ماسەلەنى ءبىرجاقتى شەشۋ ءۇشىن «التايدان ۇشقان اقيىققا» ارناپ جاڭا ەسكەرتكىش ورناتۋ تۋرالى تاپسىرما بەرگەن.

«ەسكەرتكىشتىڭ العاشقى ەسكيزى دايىن. قالالىق ت ۇ ك ش، جولاۋشىلار كولىگى جانە اۆتوموبيل جولدارى ءبولىمىنىڭ ماماندارى ونىڭ ماڭايىن اباتتاندىرۋ بويىنشا جوبا دايىنداپ جاتىر. ماڭايىندا كولىك توقتاپ، تاعزىم ەتەتىندەي الاڭقاي توسەلەدى. الداعى قالالىق ءماسليحات سەسسياسىندا بيۋدجەتكە تاپسىرىس بەرىلەدى» - دەيدى الىبەك تۇرسىمبەتوۆ.

قازىرگى تاڭدا شاھارداعى 26 كوشەمەن بىرگە ج. مالدىبايەۆ اتىنداعى كوشەدە دە جوندەۋ جۇمىستارى ءجۇرىپ جاتىر.

**

مالدىبايەۆ جاقىپبەك - 1907 - جىلى قازىرگى شىعىس قازاقستان وبلىسى زايسان اۋدانى شەڭگەلدى اۋىلىندا تۋعان.   1938 -جىلى تاشكەنت ماڭىندا ۇشاق اپاتىنان قازاعا ۇشىراعان. تۇڭعىش قازاق ۇشقىشى. اۋىل مەكتەبىندە مۇسىلمانشا ساۋات اشىپ، التىن كەندەرىندە، اۋىلدىق كەڭەستەردە ءار ءتۇرلى قىزمەت اتقارعان. 1929 -جىلى اسكەر قاتارىنا الىنىپ، تۇركىستان ەرەكشە اتتى اسكەر بريگاداسىنىڭ 82-پولكىندە ۆزۆود كومانديرىنىڭ كومەكشىسى بولدى.

 1932 -جىلى ناۋرىزدان بىرىككەن ورتا ازيا اسكەري مەكتەبىنىڭ كاۆالەريا بولىمشەسىندە وقىدى. 1933 -جىلى 1 - قاڭتاردا ۇشقىشتار جانە ۇشقىش باقىلاۋشىلار دايارلايتىن مەكتەپتى، ونان سوڭ اسكەري اۋە كۇشتەرى جانىنداعى ارنايى اسكەري قىزمەت كۋرسىن ءبىتىردى. 1934 -جىلى 24 - شىلدەدە ورتا ازيا اسكەري وكرۋگىنىڭ ستاليناباد قالاسىنداعى 40-ەرەكشە اۆياتسيا وتريادىنا اعا ۇشقىش- باقىلاۋشى جانە فوتوقىزمەت باستىعى بولىپ، 1937 ج. 19 - ماۋسىمدا ۇشقىشتار زۆەنوسى فلاگشتۋرمان قىزمەتىنە تاعايىندالدى.

 كەيبىر دەرەكتەرگە قاراعاندا مالدىبايەۆ 1937 -جىلى 17- ناۋرىز - 1938 - جىلى 14- قاڭتار ارالىعىندا ماسكەۋدەگى اسكەري- اۋە اكادەمياسىنىڭ شتۋرماندىق بولىمىندە وقىعان. حاسان كولى ماڭىنداعى ۇرىسقا، يسپانياداعى ازامات سوعىسىنا قاتىسقان. زايسان قالاسىندا، كۇرشىم، مارقاكول اۋىلدارىندا كوشە اتتارى، شەڭگەلدى اۋىلىنداعى مەكتەپ مالدىبايەۆ ەسىمىمەن اتالادى.

اۆتور: ەسىمجان ناقتىباي