ترامپ پەن ەردوعاننىڭ نە كوزدەگەنى بار؟
نۇر-سۇلتان. قازاقپارات - ترامپ پەن ەردوعان س-400 قارۋىن تۇركياعا ورنالاستىرۋ ماسەلەسىن تالقىلادى.
ا ق ش پرەزيدەنتى دونالد ترامپ پەن تۇركيا پرەزيدەندى رەجەپ ەردوعان تەلەفونمەن سويلەسىپ، رەسەيدىڭ س-400 زەنيتتى- زىمىران كەشەنىن تۇركياعا ورنالاستىرۋ مۇمكىندىگىن تالقىلادى.
انكارانىڭ رەسمي مالىمەتى بويىنشا، ەردوعان ترامپقا س-400 كەشەنىنىڭ ساۋداسىنا قاتىستى ەكى ەلدىڭ بىرلەسكەن كوميسسياسىن قۇرۋدى ۇسىنعان. اق ءۇيدىڭ مالىمدەمەسىندە بۇل تۋرالى ايتىلمادى. تۇركيانىڭ رەسەيدەن س-400 ساتىپ سالعىسى كەلگەن جوسپارن ا ق ش قاتاڭ سىناپ وتىر. ۆاشينگتون رەسەي قارۋىن تۇركيا اۋماعىنا ورنالاستىرۋ ناتو ستاندارتتارىنا قايشى كەلەدى دەپ ەسەپتەيدى.
بۇنىڭ الدىندا ەردوعان ءوز شەشىمىنەن باس تارتپايتىنىن مالىمدەگەن. بۇل نيەتىن ول جاقىندا ماسكەۋدە رەسەي پرەزيدەنتى ۆلاديمير پۋتينمەن كەزدەسۋدە راستادى. العاشقى اسكەري كەشەن تۇركياعا بيىل شىلدەدە جەتكىزىلەدى دەپ جوسپارلانعان.
ا ق ش پەن تۇركيا كەلىسپەيتىن تاعى ءبىر ماسەلە - يرانعا قارسى امەريكالىق سانكسيالار. سيرياداعى جاعداي دا كەلىسپەۋشىلىكتەر تۋعىزدى، ويتكەنى ەردوعان ا ق ش- تىڭ «يسلام مەملەكەتى» تەرروريستىك توبىمەن كۇرەستەگى وداقتاسى - كۇردتەرگە قارسى قارۋلى وپەراتسيا جۇرگىزگىسى كەلەدى.