ۆەنەسۋەلا پرەزيدەنتىنىڭ كۋباعا قاشپاق بولعانى راس پا؟

نۇر-سۇلتان. قازاقپارات - ۆەنەسۋەلاداعى داعدارىس الەمدىك ب ا ق پەن حالىقارالىق قوعامنىڭ نازارىندا. ويتكەنى وپپوزيتسيا كوشباسشىسى، ءوزىن ءوزى ۋاقىتشا پرەزيدەنت ەتىپ جاريالاعان حۋان گۋايدو ەلدە توڭكەرىس جاريالادى.

 مادۋرونى بيلىكتەن قۇلاتۋ ءۇشىن ۆەنەسۋەلالىقتاردى كوشەگە نارازىلىق شاراسىنا شىعۋعا شاقىردى. «ەگەمەندىك وپەراتسياسى» اتاۋىن العان ەرەۋىلدىڭ سوڭى قاقتىعىسقا ۇلاستى. زارداپ شەككەندەر بار. ب ۇ ۇ مەن وزگە دە حالىقارالىق ۇيىمدار تاراپتاردى سابىرعا كەلۋگە شاقىردى.

سونىمەن بۇل مەملەكەتتىك توڭكەرىس پە؟ الدە «ەگەمەندىك وپەراتسياسى» ما؟

وسى بۇلعاقتان سوڭ ءبىر ادام قازا تاۋىپ، جۇزدەن اسا تۇرعىن ءتۇرلى دەڭگەيدە جاراقات الدى. ۆەنەسۋەلاداعى ەرەۋىلدىڭ سالدارى وسىنداي. بۇل تۋرالى «Provea» ۇكىمەتتىك ەمەس ۇيىمى مالىمدەدى.

ەلدەگى جاعداي وپپوزيتسيا باسشىسى حۋان گۋايدونىڭ مالىمدەمەسىنەن سوڭ ۋشىعا ءتۇستى. ءوزىن- ءوزى ۋاقىتشا پرەزيدەنت ەتىپ جاريالاعان گۋايدو لا- كارلوتا اسكەري بازاسىندا ۇلتتىق اسكەردىڭ ءوز تاراپىنا وتكەنىن جاريالادى. حالىقتى «ەگەمەندىك وپەراتسياسىنىڭ» سوڭعى كەزەڭىنە شىعۋعا شاقىردى.

حۋان گۋايدو، وپپوزيتسيا كوشباسشىسى:

 - ۇلتتىق اسكەر ءبىزدىڭ جاقتا. بارلىعىمىز بىرىگىپ، ەل بولاشاعى ءۇشىن، ەگەمەندىك ءۇشىن كۇرەسۋىمىز قاجەت. مىڭداعان حالىق وپپوزيتسيانى جاقتاپ، كوشەگە شىعىپ جاتىر. حالىقارالىق ۇيىمداردان دا قولداۋ سوزدەر ەستىپ جاتىرمىن. بۇل ءىستى سوڭىنا دەيىن جەتكىزىپ، مادۋرونى تاقتان قۇلاتۋىمىز كەرەك. بيلىك اۋىسۋ ۇدەرىسى بەيبىت تۇردە جۇزەگە اساتىن بولادى.

 حۋان گۋايدو ايتىپ وتىرعان بەيبىت ۇدەرىستىڭ سوڭى قاقتىعىسقا ۇلاستى. كوشەگە شىققان حالىق وپپوزيتسيا جاقتاستارى جانە ۇلتتىق اسكەردى ساتقىندارعا بالاعان قازىرگى پرەزيدەنت مادۋرو جاقتاستارى بولىپ ءبولىندى. ول ازداي ءبىر- بىرىنە تاس لاقتىرىپ، ەرەۋىل باستالىپ كەتتى. ءتىپتى ۇلتتىق گۆارديانىڭ بروندالعان اۆتوكولىگى ءبىر توپ ادامنىڭ ۇستىنەن ءجۇرىپ ءوتتى. ودان بولەك ا ق ش وتقا ماي قۇيعانداي بولدى.

ا ق ش مەملەكەتتىك حاتشىسى مايك پومپەو «نيكولاس مادۋرو كۋباعا قاشپاق بولدى» دەگەن سۇحبات بەرىپ، جاعدايدى ودان ءارى ۋشىقتىرا ءتۇستى.

 مايك پومپەو، ا ق ش مەملەكەتتىك حاتشىسى:

- نيكولاس مادۋرو ۇشاعىن دايىنداپ، كۋباعا قاشپاق بولعان جەرىنەن رەسەي ەلى كوندىرگەن. سولاردىڭ قولداۋىمەن مادۋرو ەلدە بيلىكتە قالىپ وتىر. دەگەنمەن، ءبىز تاعى ءبىر مارتە ەسكەرتىپ وتەيىك. ا ق ش وپپوزيتسيا باسشىسى حۋان گۋايدونى قولدايدى. ۆەنەسۋەلالىقتاردىڭ ەگەمەن ەلدە ءومىر ءسۇرۋى ءۇشىن قولدان كەلگەنىن جاسايدى.

 ا ق ش تاراپىنىڭ بۇل مالىمدەمەسىنە رەسەي تاراپى بىردەن جاۋاپ قاتتى. سىرتقى ىستەر مينيسترلىگىنىڭ رەسمي وكىلى ماريا زاحاروۆانىڭ ايتۋىنشا «بۇل فەيك اقپارات». ۆاشينگتون سول ارقىلى حالىقتىڭ ساناسىنا اقپاراتتىق شابۋىل جاساپ وتىر. بۇل ايىپتى قازىرگى پرەزيدەنت نيكولاس مادۋرو دا مويىندامادى.

 نيكولاس مادۋرو، ۆەنەسۋەلا پرەزيدەنتى:

 - مايك پومپەونىڭ جاساعان مالىمدەمەسىنە بارىپ تۇرعان جالعان اقپارات. دجون بولتوندا ۇلتتىق اسكەردى ماعان قارسى قويماق. سول ارقىلى ەلدە وسىنداي كوتەرىلىس ۇيىمداستىرىپ وتىر. ۇلتتىق گۆارديا قاشاندا مەنى، ۇكىمەتتى قولدايدى. ەلدە رۇقسات ەتىلمەگەن ەرەۋىل ۇيىمداستىرىپ، ەل تۇتاستىعىنا زالالىن تيگىزگەن حۋان گۋايدو سوت الدىندا جاۋاپ بەرەدى. بۇل قىلمىسقا قاتىسى بار ءاربىر تۇلعا تەرگەۋگە تارتىلادى.

تاراپتار وسىلاي ءبىر- بىرىنە ايىپ تاعىپ جاتقاندا، ەلدە ەرەۋىل ءورشىپ بارادى. بيلىگى ەكىگە بولىنگەن ەلدىڭ حالقى دا قاققا جارىلدى. بۇل ورايدا ب ۇ ۇ مەن حالىقارالىق ۇيىمدار تاراپتاردى سابىرلى بولۋعا شاقىرۋدا. ال الەم ەلدەرىنىڭ ءبىرى گۋايدونى قولداسا ءبىرى مادۋرونىڭ ءسوزىن سويلەۋدە.

www.24.kz