پاۆلودارلىق بويجەتكەن «قازاقستان ارۋى» اتاندى
«قازاقستان ارۋى - 2019» بايقاۋى NOMAD City Hall ساحناسىندا ءوتتى. قازىلار القاسى ەلىمىزدىڭ بارلىق وڭىرىنەن قاتىسقان 32 ارۋدىڭ تەك 5-ەۋىن سۋپەر- فينالعا شىعاردى. ولار ءۇش تاپسىرمانى ورىندادى: ءوزىن تانىستىرۋ، كيىم ۇلگىسىن كورسەتۋ جانە قىسقا مەتراجدى فيلم ارقىلى ءوز ءوڭىرىنىڭ تۋريستىك الەۋەتىن پاش ەتۋ.
اقىلىنا كوركى ساي ارۋدى قازاقستاندىقتار SMS- پەن ونلاين- داۋىس بەرۋ ارقىلى تاڭدادى. ونىڭ ناتيجەسىندە بيىلعى بايقاۋدىڭ جەڭىمپازى 19 جاستاعى پاۆلودارلىق ءمادينا باتىق اتاندى.
«الدىمەن اتا- اناما العىس ايتامىن. ءدال قازىرگى قۋانىشىمدى سوزبەن جەتكىزە المايمىن. ارينە، سىنعا تۇسكەننەن سوڭ، جەڭىستەن ۇمىتتەندىم. بايقاۋدان ۇتىپ العان سىي اقىمدى اتا- اناما تابىس ەتەمىن. بۇگىن مەنى قولداۋعا اتا- انام مەن جاقىندارىم جانە دوستارىم كەلدى. ارمانىم اتا- انامنىڭ ءۇمىتىن اقتاۋ جانە ەلىمە قىزمەت ەتۋ»، - دەدى 2019 -جىلعى «قازاقستان ارۋى» ءمادينا باتىق.
م. باتىق س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ تۋريزم فاكۋلتەتىنىڭ ستۋدەنتى.
جەڭىمپازعا دەمەۋشىلەر اتىنان 3 ميلليون تەڭگە قارجىلاي سىياقى، قازاقستان اتىنان «الەم ارۋى» بايقاۋىنا قاتىسۋعا جانە پاريج قالاسىندا شوپينگ جاساۋعا جولدامالار بەرىلدى.
ودان بولەك، ءبىرىنشى ۆيتسە- ميسس تيتۋلىن الماتى قالاسىنىڭ نامىسىن قورعاعان ديانا ابىشيەۆا جەڭىپ السا، ەكىنشى ۆيتسە- ميسس اتاعى سەمەيلىك نادەجدا نەدوسەكوۆاعا بۇيىردى.
بۇعان دەيىن حابارلاعانىمىزداي، بۇگىن ەلوردادا 22- رەت «قازاقستان ارۋى» بايقاۋى ءوتتى. بيىلعى سۇلۋلىق سايىسىنا 7 مىڭنان استام ءوتىنىم كەلىپ تۇسكەن. فينالعا ولاردىڭ 32 ءسى تاڭداپ الىندى.
ايتا كەتسەك، ۇيىمداستىرۋشىلار بيىلعى بايقاۋدىڭ جاڭا فورماتتا وتەتىنىن ءمالىم ەتكەن بولاتىن. اتاپ ايتقاندا، ق ر مادەنيەت جانە سپورت مينيسترلىگىنىڭ قولداۋىمەن الەۋمەتتىك جوبا قوسىلدى.
«ونىڭ ماقساتى - ەل وڭىرلەرى بويىنشا جارنامالىق- اعارتۋشىلىق روليكتەردىڭ ارنايى توپتاماسىن ازىرلەۋ. ەگەر بۇعان دەيىن قىزدار جوبا ءۇشىن ۆيزيتكا جازىپ، ءوزى، وتباسى جايىندا عانا اڭگىمەلەپ بەرسە، اعىمداعى جىلى ءاربىر قاتىسۋشى وزدەرىنىڭ سۇيىكتى قالالارىنىڭ، وڭىرلەرىنىڭ تۋريستىك مۇمكىنشىلىكتەرىن تانىستىرادى. بۇل ىشكى تۋريزمدى دامىتۋعا سەپتىگىن تيگىزەدى»، - دەگەن بولاتىن «قازاقستان ارۋى» بايقاۋىنىڭ ديرەكتورى الەنا ريەۆلينا.
اۆتور: داۋلەت ىزتىلەۋ