قىتايعا نەلىكتەن پرەزيدەنت ەمەس، ەلباسى باردى - داۋرەن ابايەۆتىڭ پىكىرى
«ەڭ الدىمەن، نۇرسۇلتان نازاربايەۆ بەيجىڭگە «ءبىر بەلدەۋ، ءبىر جول» فورۋمىنىڭ قۇرمەتتى قوناعى جانە قىتاي كوشباسشىسى شي جينپيڭنىڭ دوسى رەتىندە شاقىرىلعانىن ايتا كەتكىم كەلەدى. ءوزىڭىز بىلەتىندەي، ەسكى دوستىققا دەگەن قۇرمەتتى كورسەتۋ - قىتاي بيلەۋشىلەرىنىڭ ەجەلگى ءداستۇرى. بۇعان قوسا، ەڭ ءبىرىنشى رەت «ءبىر بەلدەۋ، ءبىر جول» باعدارلاماسى تۋرالى شي جينپيڭ قازاقستانعا كەلگەندە ءسوز قوزعاعان بولاتىن. ەلباسىنىڭ باسشىلىعىنداعى ءبىزدىڭ ەل - ءاردايىم وسى باستامانىڭ ىسكە اسىرىلۋىندا جەتەكشى رولگە يە بولىپ كەلەدى. سونىمەن بىرگە، نۇرسۇلتان نازاربايەۆتىڭ جوعارعى «دوستىق» وردەنىمەن ماراپاتتالعانىن اتاپ وتكىم كەلەدى. شەتەلدىك كوشباسشىلاردىڭ ىشىندە ول وردەنمەن تەك رەسەي باسشىسى ۆلاديمير پۋتين عانا ماراپاتتالعان بولاتىن»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسى بارىسىندا.
ايتا كەتەيىك، نۇرسۇلتان نازاربايەۆ «ءبىر بەلدەۋ، ءبىر جول» 2- حالىقارالىق ىنتىماقتاستىق فورۋمىنا قاتىسۋ ءۇشىن قىتاي حالىق رەسپۋبليكاسىنا بارعان بولاتىن.
ەلباسى شارانىڭ سالتاناتتى اشىلۋى بارىسىندا سويلەگەن سوزىندە «ءبىر بەلدەۋ، ءبىر جول» باستاماسىنىڭ العاشقى ءارى تابىستى جەتىستىكتەرىن اتاپ ءوتتى.
سونداي- اق اتالمىش باستاما ارقىلى ەۋرازيا قۇرلىعى قايتا بىرىگىپ، ەكى مىڭ جىل بۇرىنعىداي ءبىر ارناعا توعىسقانىن ايتتى.
ال فورۋم سەسسياسىندا ەلباسى قازىرگى زامانعى جاھاندىق سىن- قاتەرلەرگە توتەپ بەرۋدىڭ جولدارى تۋرالى ءسوز سويلەپ، جاڭا گەوساياسي احۋالدىڭ «ءۇش د» ۇلگىسىن ۇسىندى.
سونداي- اق، نۇرسۇلتان نازاربايەۆ قىتاي حالىق رەسپۋبليكاسىنىڭ «دوستىق» وردەنىمەن ماراپاتتالدى.
اۆتور: ايان بەكەن ۇلى