شەكاراشىلار بوتەن قۇجاتپەن جانە جالعان ۆيزامەن جۇرگەن شەتەلدىكتەردى ۇستادى

تاراز شەكارا جاساعىنىڭ «سىپاتاي باتىر-اۆتو» بولىمشەسىندە بوتەن بىرەۋدىڭ قۇجاتىن پايدالانىپ شەكارادان وتپەك بولعان قىرعىزستاندىق ايەل ۇستالدى. تۇنگى ساعات 03:45 شاماسىندا شەكارادان وتۋگە كەلگەن ايەل شەكاراشىلارعا 1992-جىلعى فاريدا ەسىمدى قىرعىز ازاماتىنىڭ ءتولقۇجاتىن ۇسىنعان. الايدا، تەكسەرە كەلە ول 1983-جىلى تۋعان قىرعىز ازاماتى ەلنۋرا بولىپ شىقتى. شەكارالىق وكىلدەر كەزدەسۋى ۇيىمداستىرىلىپ، ايەل ەلىنە قايتارىلدى.

اتالعان جاساقتىڭ «گرودەكوۆو» زاستاۆاسىنىڭ اۋماعىندا شەكاراشىلار تۇنگى 23:00 شاماسىندا قىزمەتتىك ءيتتىڭ كومەگىمەن، قىرعىز رەسپۋبليكاسىنان ءبىزدىڭ ەلگە قاراي مەملەكەتتىك شەكارانى بۇزىپ وتۋگە ارەكەتتەنىپ جاتقان جاسى 17 شاماسىنداعى قىرعىز ازاماتىن ۇستادى. ايتۋىنا قاراعاندا، ءتۇننىڭ جارىمىندا وزگە مەملەكەتتىڭ اۋماعىنا زاڭسىز جولمەن وتپەك بولعان سەبەبى - «اكەسىنىڭ اشۋىنا ءتيىپ الىپ، تاياق جەۋدەن قورقىپ قاشقان». انىق-قانىعىن انىقتاۋ ءۇشىن بوزبالا اسسى اۋداندىق پوليتسيا بولىمىنە تاپسىرىلدى.

الماتى قالاسىنداعى حالىقارالىق اۋەجايدا شەكاراشىلار «الماتى-بىشكەك» باعىتىمەن ۇشقالى تۇرعان ك س-109 اۋە رەيسىنەن 1983-جىلى تۋعان اۋعانستان ازاماتىن ۇستادى. ۇستاۋعا سەبەپ بولعان - كانادانىڭ قولدان جاسالعان ۆيزاسى.

سارىاعاش شەكارا جاساعىنىڭ «قاپلانبەك» شەكارا زاستاۆاسى اۋماعىندا ساعات تۇنگى 22 لەر شاماسىندا ءتۇن قاراڭعىلىعىن پايدالانىپ مەملەكەتتىك شەكارانى بۇزىپ، ءبىزدىڭ ەلگە وتپەك بولعان جاسى 40 تار شاماسىنداعى وزبەكستان ازاماتى ۇستالدى. ۇستالعان ازاماتتىڭ كىم ەكەنىن جانە قانداي ماقساتپەن جۇرگەنىن سارىاعاش اۋداندىق پوليتسيا ءبولىمى انىقتاپ جاتىر.