تۇركىستاندا «بالۋان شولاق» فيلمىنىڭ پرەمەرالىق كورسەتىلىمى ءوتتى
فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.
فيلمنىڭ رەجيسسەرى - نۇرگەلدى سادىعۇلوۆ. تاريحي كينولەنتا پالۋان، ءانشى ءارى كومپوزيتور بالۋان شولاققا ارنالعان.
قازاق سال-سەرىلەرىنىڭ سوڭعى تۇياعى، تاريحتا «بالۋان شولاق» دەگەن اتپەن بەلگىلى ءوزى بالۋان، ءارى اقىن ءارى سەرى نۇرماعانبەت بايمىرزا ۇلى جايىنداعى فيلمدە ازاماتتىڭ ەل باسىنا قيىن- قىستاۋ كۇن تۋعان شاقتا جاساعان ەرلىگى بايان ەتىلەدى. سەناريدەگى نەگىزگى وقيعا ورىس پەرەسەلەندەرىنىڭ قازاق دالاسىنا كوشىرىلگەن ساتىمەن، سول عاسىرداعى قازاق قوعامىنداعى قيىن كەزەڭمەن ورنەكتەلگەن. فيلم بالۋان شولاقتىڭ تۇرمەدە جاتقان تۋعان-تۋىس، باۋىرلارىن بوساتىپ، ادىلدىككە قول جەتكىزۋىمەن اياقتالادى. فيلمدە قازاق قوعامىنىڭ وتارشىلدىققا قارسى كوزقاراسى، كۇرەسى كورىنىس تاپقان.
اتاقتى بالۋاننىڭ ءرولىن ەركەبۇلان دايىروۆ سومداعان. سونىمەن قاتار البينا شارداروۆا، مەدعات ومىراليەۆ، الەكساندر باگريانسەۆ سىندى اكتەرلاردى كورە الامىز.
«بالۋان شولاق» فيلمىنىڭ يدەيا اۆتورى، ءارى سەناريىن جازعان - وبلىسىمىزدىڭ تۋماسى، مەملەكەتتىك سىيلىقتىڭ يەگەرى، جازۋشى، دراماتۋرگ دۋلات يسابەكوۆ.
كورسەتىلىم بارىسىندا رەجيسسەرلىق توپ تۇركىستانىق كورەرمەنمەن جانە جاستارمەن كەزدەستى. دۋلات يسابەكوۆ «بالۋان شولاق» ءفيلمىن ءوزىنىڭ كينو سالاسىنداعى ەڭ تابىستى جوبالارىنىڭ ءبىرى ەكەنىن ايتتى. ال فيلم رەجيسسەرى نۇرگەلدى سادىعۇلوۆ بۇل تۋىندى قازاق جاستارىنىڭ وتانشىلدىق سەزىمىن وياتاتىنىنا سەنىم ءبىلدىردى. تۇركىستان وبلىسى اكىمىنىڭ ورىنباسارى مالىك وتاربايەۆ فيلم رەجيسسەرى مەن سەناري اۆتورىنا جانە شىعارماشىلىق توپقا العىسىن ايتىپ، وبلىس اكىمى اتىنان سىي-سياپات جاسادى. اتالعان فيلمدى قازاقستانمەن بىرگە تۇركى الەمىنە دە تاراتۋ كەرەكتىگىن ايتتى. كەش سوڭىندا تۇركىستاننىڭ ونەرسۇيەر قاۋىمى دۋلات يسابەكوۆپەن ەستەلىك سۋرەتكە ءتۇسىپ، قولتاڭباسىن الدى.