داريعا نازاربايەۆا جەكە ءۇي قۇرىلىسىنا جەر ءبولۋ ماسەلەسىنە قاتىستى پىكىر ءبىلدىردى
«ەگەر دە وڭىرلەر بولىنىسىندە قارايتىن بولساق، وندا جەكە تۇرعىن ءۇي قۇرىلىسى ءۇشىن جەر ۋچاسكەسىنە دەگەن كەزەكتە ونداعان مىڭ ادام تۇر. بۇل ادامدار بيۋدجەتتەن اقشا سۇراپ تۇرعان جوق، ولار ۋادە ەتىلگەن 10 سوتىق جەردى ءبولىپ بەرۋدى سۇراپ وتىر جانە سول ۋچاسكەگە ءوز ۇيلەرىن سالۋعا دايىن. ءاربىر جاڭا ءۇي ءار ءوڭىردىڭ قوسىمشا مۇلىگى بولىپ سانالادى، وسى ورايدا جەر تەلىمى سالىعى، مۇلىك سالىعى، كوممۋنالدىق تولەمدەر ەسەپتەلەدى. بۇل ءوز كەزەگىندە كەز كەلگەن ەلدى مەكەننىڭ بيۋدجەتتەگى كىرىس بولىگىن تولىقتىرادى» ، - دەدى ول پارلامەنت سەناتىنىڭ جالپى وتىرىسىندا.
سەنات سپيكەرىنىڭ پايىمىنشا، باسپانا كەزەگىندە تۇرعان ادامداردىڭ باسىم بولىگىنىڭ ماسەلەسىن جەكە تۇرعىن ءۇي قۇرىلىسى ارقىلى شەشۋگە بولادى.
«باسپانا ماسەلەسىن تۇبەگەيلى شەشۋ كەرەك، سەبەبى بۇل پروبلەما جىل سايىن جالعاسىپ كەلەدى. ءبىز بارلىق سىلتاۋدى الدىن الا بىلەمىز، ياعني «ينفراقۇرىلىمدىق دامۋعا قارجى از بولىنەدى» ، «ترانسفەرتتەن اقشا جەتكىلىكسىز ءبولىندى» دەگەن ءۋاج ايتىلادى. مەنىڭ ويىمشا، بۇل جاعدايدى وڭتايلى شەشۋگە بولادى، وسى تۇرعىدا كوپتەگەن قارجىلىق تەتىكتەردى پىسىقتاۋ كەرەك» ، - دەدى داريعا نازاربايەۆا.
بۇدان بۇرىن حابارلانعانداي، پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى.
قۇجات كوپبالالى وتباسىلاردىڭ جانە جۇمىس ىستەيتىن جاستاردىڭ باسپانا ماسەلەسىن جەدەل شەشۋ ءۇشىن زاڭنامالىق نەگىزدى قالىپتاستىرادى.