كوپبالالى وتباسىلارعا باسپانا بەرۋ باعدارلاماسى قاشان باستالادى؟

«بۇگىن ءبىز بيىلعى مامىردىڭ اياعىندا باستالاتىن جاڭا باعدارلامانى تالقىلاماقپىز. بۇل باعدارلاما از قامتىلعان وتباسىلاردى باسپانامەن قامتاماسىز ەتۋگە نەگىزدەلگەن. وعان ءتورت جانە ودان كوپ بالاسى بار وتباسىلار، مۇمكىندىگى شەكتەۋلى بالانى تاربيەلەپ وتىرعان وتباسىلار، تولىق ەمەس وتباسىلار قاتىسا الادى. بۇل وتباسىلاردىڭ تابىسى جوعارى ەمەس. مىسالى 12 ميلليون تەڭگە زايم كولەمىندە العاشقى 8 جىلدا تولەم 60 مىڭ تەڭگە شاماسىندا، ال قالعان 11 جىلدا 44 مىڭ تەڭگە دەڭگەيىندە بولادى. وسى باعدارلاما اياسىندا قۇرىلىس سالۋشىلاردان جاڭا پاتەردى الۋعا رۇقسات ەتىلەدى. سونىمەن قاتار، اتالعان وتباسىلاردىڭ تاڭداۋىن كەڭەيتۋ ءۇشىن ەرتەرەكتە پايدالانۋعا بەرىلگەن پاتەرلەردى، جەكە تۇرعىن ءۇي تۇرىندەگى باسپانانى الۋ مۇمكىندىگى جاسالادى. مەنىڭ ويىمشا، كوپبالالى وتباسىلار ءۇشىن ەلوردا ماڭىنداعى ۇيلەر قىزىعۋشىلىق تۋدىرۋى مۇمكىن»، - دەدى ل. يبراگيموۆا ق ر تۇڭعىش پرەزيدەنتىنىڭ بەس الەۋمەتتىك باستاماسىنىڭ ىسكە اسىرىلۋىن باقىلاۋ جونىندەگى قوعامدىق كەڭەس وتىرىسى الدىندا.

ونىڭ سوزىنە قاراعاندا، قازىرگى كەزدە تۇرعىن ءۇي قۇرىلىس جيناق بانكىنە وسى باعدارلاما بويىنشا وتىنىمدەر كوپتەپ تۇسۋدە.

«كوپبالالى جانە از قامتىلعان وتباسىلار بۇل باعدارلامانى اسىعا كۇتىپ وتىر. سەبەبى وسى باعدارلامادا نەسيە بويىنشا ستاۆكا ايتارلىقتاي تومەن، ياعني جىلدىق ەكى پايىز. ءدال بۇل باعدارلامادا باستاپقى جارنا 10 پايىزعا دەيىن تومەندەتىلدى. 12 ميلليون تەڭگە تۇراتىن پاتەردى ساتىپ الۋ ءۇشىن سالىمدا 1 ميلليون 200 مىڭ تەڭگە جەتكىلىكتى»، - دەدى ول.

بۇدان بولەك، ءبىرقاتار وبلىستاردىڭ، ەلوردا مەن الماتى جانە شىمكەنت قالالارىنىڭ اكىمدىكتەرى تۇرعىن ءۇي سەرتيفيكاتتارىن ءبولۋ نيەتىن ءبىلدىرىپ وتىر. بۇل ءوز كەزەگىندە ارنايى الەۋمەتتىك كومەك رەتىندە جاسالماق. تۇرعىن ءۇي سەرتيفيكاتى كەزەكتە تۇرعان وتباسىعا بەرىلەدى جانە ونىڭ سوماسى 1 ميلليون تەڭگەگە دەيىن بولادى.

باعدارلاما تالاپتارىنا سايكەس، قۇجات تاپسىرۋ كەزىندە ءاربىر وتباسى تۇرىپ جاتقان قالاسىنداعى اكىمدىگىنە بارىپ، «كوپبالالى وتباسى»، «مۇمكىندىگى شەكتەۋلى بالانى تاربيەلەپ جاتقان وتباسى»، «تولىق ەمەس وتباسى» ساناتتارى بويىنشا كەزەكە جولداما الادى.

بۇدان بۇرىن حابارلانعانداي، جاقىندا كوپبالالى وتباسىلارعا باسپانانى 2-3 پايىزدىق نەسيەمەن بەرۋ شارالارى مامىردا باستالاتىنى ايتىلدى.

ايتا كەتەيىك، ق ر تۇڭعىش پرەزيدەنتى - ەلباسى نۇرسۇلتان نازاربايەۆ الەۋمەتتىك جاعىنان از قامتىلعان ازاماتتارعا 2 پروتسەنتتىك يپوتەكا بەرۋ ماسەلەسىن قارىستىرۋدى تاپسىرعان بولاتىن. اتالعان نەسيە ناقتى ءۇش كاتەگورياعا بەرىلۋى كەرەك. ولار - كوپبالالى وتباسىلار، تولىق ەمەس وتباسىلار جانە مۇگەدەك بالالارى بار وتباسىلار.