تۇركىستان وبلىسىنان «قازاقستان بارىسىنا» قاتىساتىن بالۋاندار بەلگىلى بولدى
جارىستا اۋداندىق جانە قالالىق ىرىكتەۋلەردە فينالعا شىققان 32 بالۋان باق سىنادى. سايىستىڭ اشىلۋ سالتاناتىندا شاردارا اۋدانىنىڭ اكىمى بولاتبەك قىستاۋوۆ بالۋاندارعا ساتتىلىك تىلەسە، سپورت ارداگەرى باقىت جاڭبىربايەۆ ءىزباسارلارىنا اق باتاسىن بەردى. وبلىستىق دەنە شىنىقتىرۋ جانە سپورت باسقارماسىنىڭ باسشىسى پولات قىرىقبايەۆ ۇزدىك سپورتشىلارعا جاعداي جاسالاتىنىن، ولار رەسپۋبليكالىق، حالىقارالىق سىندارعا قاتىساتىنىن جەتكىزدى.
تۇركىستان وبلىستىق دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن، شاردارا اۋدانى اكىمدىگىنىڭ قولداۋىمەن وتكەن جارىستا تۇركىستان قالاسىنىڭ بالۋانى بەيبارىس ءابدىعاني قارسىلاس شىداتپاي، «تۇركىستان بارىسى» اتاندى. جەڭىمپازعا ارنايى بەلبەۋ، اقتىق سايىسقا جولداما جانە شاردارانىڭ سپورت جاناشىرلارى اتىنان جاڭا «نەكسيا» اۆتوكولىگى سىيعا تارتىلدى.
«2-ورىن العان كەنتاۋ قالاسىنىڭ بالۋانى جامالحان دارحانعا ارنايى بەلبەۋ، اقتىق سايىسقا جولداما جانە 300000 تەڭگەنىڭ سەرتيفيكاتى تاپسىرىلدى. ال 3-ورىن العان وتىرار اۋدانىنىڭ بالۋانى ءابىلدا ۇلى سابىرجان ارنايى بەلبەۋ مەن 100000 تەڭگەگە يە بولدى. «جەڭىسكە دەگەن جىگەرى ءۇشىن» بايدىبەك اۋدانىنىڭ بالۋانى سىرگەباي ەرنازارعا، «كورەرمەن كوزايىمى» نوميناتسياسى بويىنشا سارىاعاش اۋدانىنىڭ بالۋانى ابدىمالىك مۇحتارعا باعالى سىيلىقتار بەرىلدى. جالپى بارلىق قاتىسۋشىلارعا ەستەلىك سىيلىقتار تابىستالدى» دەلىنگەن حابارلامادا.
جارىستىڭ جابىلۋ سالتاناتىندا تۇركىستان وبلىستىق دەنە شىنىقتىرۋ جانە سپورت باسقارماسىنىڭ باسشىلىعى جارىستى جوعارى دەڭگەيدە وتكىزۋگە اتسالىسقان شاردارا اۋدانىنىڭ اكىمدىگى مەن ارمان قارسىبايەۆ باستاعان سپورت جاناشىرلارىنا العىس ايتىپ، «قازاقستان بارىسىنا» جولداما العان قوس بالۋانعا جەڭىس تىلەدى.
