گولوۆكين «كانەلومەن» كەزدەسۋگە قاتىستى كۇتپەگەن مالىمدەمە جاسادى

نۇر-سۇلتان. قازاقپارات - قازاقستاندىق بوكسشى گەننادي گولوۆكين «كانەلومەن» جەكپە-جەگىنە قاتىستى كۇتپەگەن مالىمدەمە جاسادى.

بۇل تۋرالى sports.kz سايتى حابارلايدى.

WBC/WBA/IBF ساناتى بويىنشا الەمنىڭ بۇرىنعى چەمپيونى گەننادي گولوۆكين ESPN Deportes باسىلىمىنا بەرگەن سۇحباتىندا ساۋل «كانەلو» الۆارەسپەن ءوتۋى مۇمكىن ءۇشىنشى كەزدەسۋ جايلى ايتتى.

GGG قازىر ەكى بوكسشىنىڭ دا ءتيىمدى پوزيتسيادا ەكەنىن، الداعى ۋاقىتتا ءۇشىنشى جەكپە-جەك ۇيىمداستىرىلسا، كەرەمەت كەزدەسۋ بولاتىنىن العا تارتتى.

گولوۆكيننىڭ سوزىنشە، ول «كانەلومەن» شارشى الاڭعا شىعۋدان باس تارتپاعان.

«مۇنداي بولعان جوق. مەن باس تارتقانىم تۋرالى ءبىرىنشى رەت ەستىپ تۇرمىن. مەن ءبىزدىڭ ءۇشىنشى كەزدەسۋ وتەدى دەپ ۇمىتتەنەمىن»، - دەدى ول.

ودان بولەك، GGG اتاق ءۇشىن ەمەس، ۇزدىك بوكسشىلارمەن ۇزدىك كەزدەسۋلەردە ونەر كورسەتۋ ءۇشىن جۇدىرىقتاساتىنىن جەتكىزدى.