الماتىدا «ارۋاق» فيلمىنىڭ تۇساۋكەسەرى ءوتتى
فيلمدە باستى ءرولدى قازاق كينوسىنىڭ مەترى اسانالى ءاشىموۆ سومدايدى. ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن كارتينانىڭ رەجيسسەرى - قۋات احمەتوۆ.
«يدەيا اۆتورى اسانالى ءاشىموۆ. 2014 -جىل. ەلدەن شالعاي تۇراتىن قارت تۋرالى فيلم ءتۇسىرۋدى ۇسىندى. اسانالى اعانىڭ ويى بويىنشا قاريا - دالا فيلوسوفى، ءتۇرلى عىلىمعا قىزىعاتىن ادام»، - دەدى قۋات احمەتوۆ.
كارتينا ەكى كەيىپكەردىڭ - اعاتاي قارت پەن جەتىم بالانىڭ كەزدەيسوق ۇشىراسۋى تۋرالى باياندايدى. فيلم 2018 -جىلى وندىرىسكە جىبەرىلىپ، بىلتىر كوكتەمدە اياقتالعان. تۇسىرىلىمدەر الماتى وبلىسىندا، ىلە وزەنى جاعالاۋىندا وتكەن. فيلمنىڭ سسەنارييىن تۇركى ەلدەرىنىڭ ەرتەگىلەرى مەن اڭىز- اڭگىمەلەرى جەلىسى بويىنشا قۋات احمەتوۆ پەن وديلشا اگيشيەۆ جازىپ شىققان.
«ارۋاق» فيلمىنىڭ باسپا سوزگە ارنالعان كورسەتىلىمى مەن تۇساۋكەسەرى كينوتەاترىمىزدىڭ اشىلۋ كۇنىنە ورايلاستىرىلۋى، ءبىزدىڭ «قازاق فيلم» كينوستۋدياسىمەن قاتىناسىمىزدىڭ العاشقى قادامى دەپ بىلەمىن. ءبىز وتاندىق كينو ءوندىرۋشى كومپانيامەن ۇزاق مەرزىمدى سەرىكتەستىكتە جۇمىس جاساۋدى جوسپارلاپ، ونىڭ فيلمدەرىن كورەرمەنگە جەتكىزۋدە ءبارىن جاسايمىز»، - دەدى Chaplin Cinemas كينوتەاترلار جەلىسىنىڭ كوممەرتسيالىق ديرەكتورى دميتري كيريەنكو.
«ارۋاق» فيلمى جايلى: اعاتاي ەسىمدى قارتتىڭ ەشكىمى جوق. سۇيگەن جارى قايتىس بولعان. ارالارىندا بالالارى بولماعان. اعايىن- تۋىسقاندارى دا قالماعان. فيلمگە ءوز ورتاسىنان بەزىپ، دالاعا بارىپ تۇرۋدى كوزدەگەن قارت كىسىنىڭ ءومىرى ارقاۋ بولعان. ايتسە دە داناگوي، ءپالساپاشىنىڭ جولىندا بالالار ۇيىنەن قاشىپ شىققان بوبەك دەگەن كىشكەنتاي، ەلگەزەك بالا كەزىگىپ، ونىڭ باستاپقى جوسپارىن بۇزىپ كەتەدى.
قۋات احمەتوۆ - كينورەجيسسەر، كينودراماتۋرگ. رەسەي كينەماتوگرافيستەر وداعىنىڭ مۇشەسى. رەسەي كينورەجيسسەرلەرى گيلدياسىنىڭ مۇشەسى. رەسەي كينەماتوگرافياسى كوميتەتىنىڭ سسەناريستەر جانە رەجيسسەرلەر جوعارعى كۋرسىن تامامداعان (گەنناديي پولوكي شەبەرحاناسىندا، 1993 -جىل).
ەسكە سالا كەتسەك، 71- كانن كينوفەستيۆالىندە «ارۋاق» فيلمىنىڭ تانىستىرىلىمى وتكەن بولاتىن.