جاپونيادا ءتىرى جان تۇرمايتىن اۋىل تۋريستەردىڭ زارەسىن ۇشىرۋدا

 نۇر-سۇلتان. قازاقپارات - ساياحاتتاۋدى جانى سۇيەتىن جاپونيالىق فوتوگراف كەن وكي توياما ءوز ەلىنىڭ اسەم جەرلەرىن سۋرەتكە تۇسىرمەك بولىپ، ادام شوشىرلىق اۋىلعا تاپ بولادى.

جاس جىگىتتى ەلدى مەكەندە ءتىرى جان تۇرمايتىنىنان بولەك، اۋىلدىڭ ادام ەسكەرتكىشتەرىنە تولى بولعانى قورقىتقان دەپ جازادى bigpicture.ru سايتى.

ادام مۇسىندەرى عانا مەكەن ەتكەن اۋىلدى كورگەن كەن وكي ءوزىنىڭ العان اسەرىمەن الەۋمەتتىك جەلىدە بولىسكەن. ول ادام بالاسى تۇرمايتىن اۋىلدا بولۋ اركىمنىڭ بويىنان قورقىنىش سەزىمىن وياتاتىنىنا كامىل سەنىمدى.

«مەن ءوزىمدى ءبىر تىيىم سالىنعان، قاۋىپتى ايماقتى تاۋىپ العانداي بولىپ تۇرمىن. ءبىزدىڭ زاماندا مۇنداي جەرلەر بارىن بىلمەپپىن. اسا قورقىنىشتى جەر ەكەنى ءسوزسىز»، - دەدى ول.

كەيىن بۇل ەلدى مەكەننىڭ تاريحىن زەرتتەي كەلە، جاس فوتوگراف ءوزى تاپ بولعان ايرىقشا جەردىڭ بۋددالىقتار ساياباعى ەكەنىن انىقتاعان.

ونى مۋتسۋو فۋرۋكاۆا دەگەن ادام ويلاپ تاپقان. ول تۋريستەر ءۇشىن تىنىعىپ، وي جيناقتايتىن ەرەكشە مەكەن سالۋدى كوزدەگەن. الايدا، 800 دەن استام ادام ەسكەرتكىشتەرى ۋاقىت وتە، ءوزىنىنىڭ سەرگىتۋ قاسيەتىن جوعالتىپ، كەلۋشىلەردىڭ بويىنان تەك قورقىنىش سەزىمىن تۋدىرۋدا.

«مۇنداي جەرگە تۇنگى ۋاقىتتا تاپ بولدىڭىز دەلىك؟ جالعىز ءوزىڭىز. قاسىڭىزدا كومەكتەسەر ەشكىم جوق. اينالانىڭ ءبارى تولعان ادام مۇسىندەرى. وسىدان كەيىن تىنىعىپ كور مۇنداي جەردە»، - دەدى كەن وكي.