گەرمانياعا كوشكەن نەمىس قايراتكەرى: قازاقستاننان كەتەردە جۋسان جۇلىپ اكەتەمىز

 نۇر- سۇلتان. قازاقپارات - گەرمانياداعى قوعامدىق- ساياسي قايراتكەر گاۋكس ۆالتەر قازاقستاننىڭ نەمىستەرىنە، ولاردىڭ ءتىلى مەن مادەنيەتىنە قولداۋ بىلدىرگەن ەل حالقىنا، ەلباسى نۇرسۇلتان نازاربايەۆقا العىس ءبىلدىردى، دەپ حابارلايدى قازاقپارات ءتىلشىسى.

گاۋكس ۆالتەر 15 جاسىندا قازاقستاننان كوشىپ كەتكەن. قازىرگى ۋاقىتتا گەرمانياعا كوشىپ كەلىپ جاتقان نەمىستەردىڭ جاستار ۇيىمىن باسقارادى.

«23 جىل بۇرىن مەن قوڭىرات اۋىلىنان گەرمانياعا كوشىپ كەتتىم. بۇگىن قازاقستانعا قايتا كەلۋ باقىتى بۇيىرىپ وتىر. قازاقستان مەنىڭ وتانىم بولىپ قالا بەرمەك. بۇگىن ەۋروپانىڭ ميلليونداعان نەمىستەرىنىڭ اتىنان نۇرسۇلتان ءابىش ۇلى سىزگە العىس ايتقىم كەلەدى. 800 مىڭنان استام نەمىس ءوزىنىڭ تاريحي وتانىنا ورالدى، تۋعان- تۋىستارىن تاپتى. ءسىز العىس كۇنىن بەلگىلەگەن كەزدە ءبىز دە «قازاق حالقىنا مىڭ العىس» دەدىك. ءبىزدى گەرمانيادا قازاقستاندىق نەمىستەر دەپ ايتادى. ال قازاقستاندا 180 مىڭنان استام نەمىس قازاقستان حالقىنىڭ ءبىر بولىگىنە اينالدى. ءبىز نەمىستەردىڭ تىلدەرىن، مادەنيەتىن قولداعاندارىڭىزعا راحمەت ايتامىز» ، - دەيدى نەمىس قايراتكەرى قازاقستان حالقى اسسامبلەياسىنىڭ XXVII سەسسياسىندا.

 گاۋكس ۆالتەر ءوز سوزىندە «وتاننان الىس بولساق تا قازاقستانداعى جاڭالىقتارعا قۇلاعىمىز تۇرىك» دەدى.

«ءسىز نۇرسۇلتان ءابىش ۇلى، قازاقستان پرەزيدەنتتىگىن تاپسىرا وتىرىپ، بيلىكتىڭ قاقتىعىسسىز بەيبىت جولمەن ءوتۋىن قامتاماسىز ەتتىڭىز. 30 جىلدىڭ ىشىندە قازاقستان جەتكەن پروگرەسسكە قۋانىشتىمىز. ءسىزدىڭ اتىڭىز - الەمدە، گەرمانيادا وراسان زور ابىرويعا يە. ءبىز - قازاقستاننىڭ نەمىستەرى تەحنولوگيا، بيزنەس، دۋالدى ءبىلىم بەرۋدە تىعىز جۇمىس ىستەپ ءجۇرمىز. ءبىز تاقىرىپتىق سەمينارلاردى قازاقستاندا دا، گەرمانيادا دا وتكىزىپ ءجۇرمىز. ءسىز نۇرسۇلتان ءابىش ۇلى وسىنداي سەرىكتەستىككە جول اشىپ بەردىڭىز» ، - دەيدى ول.

گاۋكس ۆالتەر ءوز سوزىندە قازاقستاننىڭ وسىناۋ ستراتەگيالىق باعىتتى جالعاستىرا بەرەتىنىنە سەنىم ءبىلدىردى.

«ءبىزدىڭ نەمىستەر گەرمانيادا قازاق دالاسى تۋرالى ەستىلىكتەردى ۇمىتپايدى. نەمىستەردىڭ ءبارى قازاقستان حالقى قانداي جاقسىلىق جاساعانىن بىلەدى. قازاقستاندى سۇيەدى. كوبى وسىندا كەلىپ، جۋسان جۇلىپ الىپ كەتەدى. جۋسان ءيىسى - ءبىزدىڭ ەسىمىزگە دالانى تۇسىرەدى. قازى مەن ەت - ءبىزدىڭ ءالى كۇنگە دەيىنگى سۇيىكتى اسىمىز. ال قىمىز گەرمانيادا دا ءوندىرىلىپ جاتىر. قازاقستان حالقىنا باقىت پەن گۇلدەنۋ جولىن تىلەيمىز» ، - دەيدى گاۋكس ۆالتەر.

  ەسكە سالا كەتسەك، ەلوردادا ق ر تۇڭعىش پرەزيدەنتى - ەلباسى، قازاقستان حالقى اسسامبلەياسىنىڭ ءتوراعاسى نۇرسۇلتان نازاربايەۆتىڭ توراعالىعىمەن قازاقستان حالقى اسسامبلەياسىنىڭ XXVII سەسسياسى ءوتىپ جاتىر.