ءبىلىم جانە عىلىم ءمينيسترىن قانداي ماسەلە الاڭداتىپ وتىر؟
ءبىلىم جانە عىلىم مينيسترلىگىن جاتاقحانا قۇرىلىسى بويىنشا كەلەسى جىلعا ارنالعان جوسپاردىڭ ورىندالۋى الاڭداتىپ وتىر.
بۇل تۋرالى بۇگىن ۆەدومستۆو باسشىسى كۇلاش ءشامشيدينوۆا مالىمدەدى.
ءشامشيدينوۆانىڭ ايتۋىنشا، قازىر 19 مىڭنان استام ورىننىڭ ەنگىزىلۋىن قامتاماسىز ەتەتىن 43 جوبا ىسكە اسىرىلىپ جاتىر. بۇل جوبالار اياسىندا وسى جىلدىڭ وزىندە جوسپارلانعان 5 مىڭنىڭ ورنىنا 9196 ورىن پايدالانۋعا بەرىلەدى. ياعني، جوسپار 184 پروتسەنتكە اسىرا ورىندالادى دەپ جوسپارلانۋدا.
«جاتاقحانا قۇرىلىسى بويىنشا نۇر- سۇلتان، الماتى، شىمكەنت قالالارى مەن جامبىل وبلىسى كوش باستاپ تۇر. ال سولتۇستىك قازاقستان، اقتوبە، تۇركىستان وبلىستارىندا جۇمىس قارقىنى تومەن. مەملەكەتتىك وقۋ ورىندارىمەن سالىستىرعاندا، جەكەمەنشىك مەكەمەلەردىڭ بەلسەندىلىگى الدەقايدا جوعارى»، - دەدى ءشامشيدينوۆا ۇكىمەت وتىرىسىندا.
ول بيىلعى جىلدىڭ كورسەتكىشىنە قول جەتكىزۋ ءۇشىن ءبىرقاتار جۇمىس اتقارىلعانىن اتاپ ءوتتى. الايدا كەلەسى جىلدىڭ جوسپارىنىڭ ورىندالۋى ءبىلىم مينيسترلىگىن الاڭداتىپ وتىر. وسىعان بايلانىستى ۆەدومستۆو باسشىسى ۇكىمەتتەن ءبىرقاتار شارانى جۇزەگە اسىرۋعا قولداۋ كورسەتۋدى سۇرادى.
«ءبىرىنشى، وڭىرلەردە بارلىق وقۋ ورنى كورسەتىلگەن جاتاقحانالار سالۋدىڭ تولىق كەستەسىن بەكىتۋ. ەكىنشى، قىمبات تۇراتىن جوبالىق- سمەتالىق قۇجاتتاردى ازىرلەۋدى توقتاتۋ. ءۇشىنشى، جەر ماسەلەسىن وڭتايلى شەشۋ ماقساتىندا مەملەكەتتىك جوعارى وقۋ ورىندارىن كوممەرتسيالىق ەمەس اكتسيونەرلىك قوعام ەتىپ قايتا ۇيىمداستىرۋ جۇمىسىن جەدەلدەتۋ. ءتورتىنشى، وسى جوبانى ىسكە اسىرۋ بارىسىندا سەيسميكاعا قاتىستى ماسەلەلەر كوتەرىلدى. وسىعان بايلانىستى نورماتيۆكە سەيسميكانى ەسكەرەتىن كوەففيتسيەنتتى قاراستىرۋ»، - دەدى مينيستر.
ءمينيستردىڭ اقپاراتىنشا، جاتاقحانا قۇرىلىسىمەن اينالىساتىن كاسىپكەرلەرگە ينجەنەرلىك كوممۋنيكاتسيالارى دايىن جەر تەلىمدەرى بەرىلىپ، بانكتىك نەسيەنىڭ 7 پروتسەنتى مەملەكەت ەسەبىنەن سۋبسيديالانادى. بۇعان قوسا جاتاقحانا قۇرىلىسىنا قويىلاتىن تالاپتار جەڭىلدەتىلىپ وتىر.
«جاتاقحانا قولدانىسقا بەرىلگەننەن كەيىن ونىڭ يەسىنە 8 -جىل قاتارىنان مەملەكەتتىك تاپسىرىس ورنالاستىرىلاتىن بولادى. جاڭا قۇرىلىس جاعدايىندا ونىڭ كولەمى ءبىر ستۋدەنت ءۇشىن جىلىنا 308 مىڭ تەڭگەنى، ال رەكونسترۋكتسيا بولسا، 119 مىڭ تەڭگەنى قۇرايدى»، - دەدى ءشامشيدينوۆا.
سونىمەن بىرگە، ينۆەستوردىڭ وسى عيماراتتا اسحانا، جاتتىعۋ زالى جانە وزگە دە تۇرمىستىق قىزمەتتەردى ورنالاستىرۋ ارقىلى قوسىمشا كىرىس تابۋىنا مۇمكىندىك بەرىلگەن.