ەرجان ماكسيم: ديماش اعام مەنى قۇتتىقتاپ، قازاق تىلىندە سويلەپ ءجۇرۋىمدى سۇرادى

نۇر- سۇلتان. قازاقپارات - مادەنيەت جانە سپورت ءمينيسترى ارىستانبەك مۇحامەدي ۇلى رەسەيدەگى «گولوس. دەتي» بايقاۋىنىڭ جەڭىمپازىن قابىلداپ، تىلشىلەر ءۇشىن باسپا ءسوز ءماسليحاتىن وتكىزدى،

 دەپ حابارلايدى قازاقپارات ءتىلشىسى.

«بىزدە قازىرگى كەزدە ماقتانىشپەن ايتۋ كەرەك - ونەرپاز جاستارىمىز كوبەيىپ كەلەدى. جاقىن ارادا ا ق ش- تاعى ەڭ مىقتى «The World's Best»  بايقاۋىندا دانەليا تولەشوۆا كەرەمەت ونەر كورسەتىپ، ديماش قۇدايبەرگەن فينالعا شىعىپ، ءوز جولىن دانەلياعا بەرگەن بولاتىن. ونداي جەتىستىكتەر كوپ. سونىڭ جالعاسى رەتىندە - ءبىزدىڭ باۋىرىمىز رەسەيدەگى «گولوس. دەتي» بايقاۋىندا جوعارى ورىن يەلەندى. ول ۇلكەن جەتىستىك. بىزدە - وسىعان دەيىن جاستارىمىز مۇنداي بايقاۋلارعا شىققانىمەن، فينالعا جەتە بەرمەيتىن. ءبىراق، ءبىزدىڭ ەرجان سۋپەرفينالعا شىعىپ، ەكىنشى ورىن يەلەنىپ وتىر»، - دەدى مينيستر.

مينيستر جيىن بارىسىندا ەرجانعا سىيلىق تابىس ەتتى. ارىستانبەك مۇحامەدي ۇلى ق ح ا كونسەرتىندە ونەر كورسەتەتىنىن، الىبەك دىنىشيەۆتەن كەيىن ءان شىرقايتىنىن حابارلادى.

«كونكۋرستان كەيىن كوپ نارسە وزگەردى. قازىرگى ۋاقىتتا ينستاگرامداعى جازىلۋشىم كوبەيىپ كەلەدى. قولداپ جاتقاندارىڭىزعا كوپ راحمەت! ءبىرىنشى ورىن الماعانىما رەنجىمەيمىن»، - دەيدى ەرجاننىڭ ءوزى.

ەرجاننىڭ اتاسىنىڭ اتى ماقسىم بولعان ەكەن. الايدا قۇجات بويىنشا ماقسىم ماكسيم بولىپ وزگەرىپ كەتكەن.

«ديماش اعامداي بولسام دەيمىن. ديماش اعاما راحمەت ايتامىن. اللا پۋگاچيەۆا اپامىزبەن كەزدەسەردە ديماش اعام ۆيدەوقوڭىراۋمەن ماعان حابارلاسىپ، قۇتتىقتاۋلارىن ايتىپ جاتىر. رەسەيدە «سپاسيبو» دەپ ۇيرەنىپ قالىپپىن. ديماش اعام ماعان «قازاقشا سويلە» دەپ ەسكەرتىپ، كۇلدى»، - دەيدى ەردان ماكسيم.

ەسكە سالا كەتسەك، بىرنەشە كۇن بۇرىن رەسەيدىڭ ءبىرىنشى ارناسىنىڭ «گولوس. دەتي» كونكۋرسىنىڭ سۋپەرفينالىندا ەرجان ماكسيم ءان شىرقاپ، ەكىنشى ورىن يەلەنگەن بولاتىن.

الايدا كوپ وتپەي «گولوس. دەتي» كونكۋرسىنىڭ قورىتىندىسىنا بايلانىستى داۋ تۋىندادى. ر ب ك مالىمەتىنە قاراعاندا، رەسەيدىڭ ءبىرىنشى ارناسى ءانشى السۋ مەن بانكير يان ابراموۆتىڭ ون جاسار قىزى ميكەللا ابراموۆا جەڭىمپاز دەپ تانىلعان فينالداعى داۋىس بەرۋ قورىتىندىسىنا بايلانىستى تەكسەرۋ جۇرگىزبەكشى.

داۋىس بەرۋ قورىتىندىسى شىققاننان كەيىن ءتۇرلى ەلدەردىڭ كوپتەگەن كورەرمەندەرى نارازىلىق ءبىلدىرىپ، قايتا ەسەپتەۋدى تالاپ ەتتى. اتاقتى شوۋمەن ماكسيم گالكين دە ينستاگرامداعى پاراقشاسىنا ۆيدەو جۇكتەپ، ءوز پىكىرىن ءبىلدىردى.

اۆتور: ايان بەكەن ۇلى