ەلوردالىقتار مامىر ايىنداعى مەرەكەلەردى قالاي اتاپ وتەدى؟
نۇر-سۇلتان قالاسى اكىمدىگىنىڭ اقپاراتىنا سايكەس، 1- مامىر مەركەسىنە وراي «قازاق ەلى» مونۋمەنتىنىڭ الدىنداعى الاڭدا مەرەكەلىك كونسەرت وتەدى. وندا «ىنتىماعى ەلىمنىڭ، ەلباسىنىڭ ەڭبەگى!» مۋزىكالىق- حورەوگرافيالىق قويىلىمىن، «تەررا»، «ناز»، «تۋعان جەر» حورەوگرافيالىق ۇجىمدارىنىڭ، «الاش ۇلى» توبىنىڭ، «Z» تريوسىنىڭ، سونداي-اق قازاقستاندىق وپەرا جانە ەسترادا جۇلدىزدارى سۇندەت بايعوجيننىڭ، مەدەت چوتابايەۆتىڭ، زارينا التىنبايەۆانىڭ، مارجان اراپبايەۆا جانە اعايىندى جۇگىنىسوۆتەردىڭ ونەرىن تاماشالاۋعا بولادى. مەرەكەلىك تەاترلاندىرىلعان قويىلىم نۇر-سۇلتان قالاسىنىڭ ەتنو-مادەني بىرلەستىكتەرىنىڭ شىعارماشىلىق ۇجىمدارىنىڭ كونسەرتىمەن جالعاسادى.
سونىمەن قاتار، جينالعاندار الاڭدا ۇيىمداستىرىلاتىن بەلبەۋ كۇرەسى، ارقان تارتىس، گىر كوتەرۋ، اسىق اتۋ جانە قول كۇرەسى سىندى ۇلتتىق سپورت تۇرلەرىنەن كۇش سىناسا الادى.
بۇدان باسقا، ءاربىر ەتنو-مادەني بىرلەستىك ءوزىنىڭ ۇلتتىق تاعامدارىن ازىرلەپ، ءدام تاتۋ ءۇشىن ولاردى كوپشىلىككە ۇسىنادى. وسى ماقساتتا الاڭدا گالەرەيا تۇرىندە شاتىر كونسترۋكتسياسى ورناتىلادى. مەرەكەلىك داستارقاننىڭ ۇزىندىعى 50 مەتردى قۇرايدى.
قازاقستان حالقىنىڭ بىرلىگى كۇنىنە ارنالعان مەرەكەلىك شارا «قازاق ەلى» الاڭىندا ساعات 10:00 مەن 16:00 ارالىعىندا وتەدى.
وسى كۇنى ساعات 12:00-دەن 18:00-گە دەيىن اكىمدىك الدىنداعى قالالىق الاڭدا (بەيبىتشىلىك كوشەسى مەن اباي داڭعىلىنىڭ بۇرىشى) تانىمال ەسترادا انشىلەرىنىڭ كونسەرتى وتەدى. ساحنا تورىندە قانات ۇمبەتوۆ، گازيزحان، ەرنار ايدار جانە وزگە دە جۇلدىزدار ونەر كورسەتەدى. مەرەكەلىك كونسەرت جۇرگىزۋشىلەرى - بەلگىلى شوۋمەندەر ازامات پەن انتون، داۋرەن امرەيەۆ. سونداي-اق، مەرەكە قوناقتارى اسىق اتۋ، ارقان تارتىس، گىر كوتەرۋ جانە قول كۇرەسىنەن جارىستاردا باسەكەگە تۇسەدى.
بۇدان بولەك، 1- مامىردا ساعات 17:00-دە EXPO كونگرەسس ورتالىعىندا كومپوزيتور ارمان دۇيسەنوۆتىڭ «ارمان دوستىعى» اتتى شىعارماشىلىق كەشى وتەدى. كونسەرتكە روزا رىمبايەۆا، نۇرجامال ۇسەنبايەۆا، تولقىن زابيروۆا، ءجاميلا سەركەبايەۆا، توقتار مەن بەيبىت، ينديرا ەلەمەس، مارجان اراپبايەۆا، ايگۇل قوسانوۆا، ەرلان رىسقالي، ايگەرىم قالاۋبايەۆا، «نۇر-مۇقاسان»، «مۋزارت» توپتارى جانە شەتەلدىك ارتيستەر قاتىسادى. بيلەتتەر www.topticket.kz سايتىندا ونلاين جانە قالالىق كاسسالاردا («Keruen city» س و س و، «كەرۋەن» س و س و، «استانا» كونسەرت زالى، «جاستار» سارايى) ساتىلادى. باعاسى 2-8 مىڭ تەڭگە ارالىعىندا.
بۇدان باسقا، ەلوردالىق تەاترلاردا، مۋزەيلەردە جانە باسقا دا مادەني مەكەمەلەردە قازاقستان حالقىنىڭ بىرلىگى كۇنىنە ورايلاستىرىلعان تاقىرىپتىق كورمەلەر، سپەكتاكلدەر، كونتسەرتتەر مەن سپورتتىق جارىستار ۇيىمداستىرىلادى. جالپى، نۇر-سۇلتان قالاسىندا 20 دان اسا شارا وتكىزىلەتىنى جوسپارلانعان. شارالار كەستەسىمەن مادەنيەت جانە سپورت باسقارماسىنىڭ سايتىنان تانىسۋعا بولادى.
ال 7- مامىر مەرەكەسىنە وراي اكىمدىك الدىنداعى قالالىق الاڭدا ديسكوتەكا فورماتىندا بەس ساعاتتىق كونسەرت ۇيىمداستىرىلادى. ءمادينا ءسادۋاقاسوۆا، بەيبىت قۇشقاليەۆ، Ayree, « زامان» ، «3038» توبى، رايم مەن ارتۋر ەلوردالىقتاردى وتان قورعاۋشى كۇنىمەن قۇتتىقتايدى. كونسەرت ساعات 17:00 دە باستالىپ، 22:00 دە اياقتالادى.
جەڭىس كۇنىن مەرەكەلەۋ اياسىندا 8- مامىردا ساعات 10:00 دە ورتالىق قالالىق زيراتتا ەكىنشى دۇنيەجۇزىلىك سوعىستا قازا بولعان جاۋىنگەرلەردىڭ زيراتىنا داڭق گۇل تىزبەگى جانە گۇل سەبەتتەرى قويىلادى. سونىمەن قاتار، وسى كۇنى «استانا» كونسەرت زالىندا «وتان دەپ سوققان جۇرەگى...» كونسەرتى وتەدى، وندا سوعىس جىلدارىنداعى اندەر ورىندالماق.
9- مامىر كۇنى ساعات 11:00 دە «وتان قورعاۋشىلار» مونۋمەنتىنە «داڭق گۇل تىزبەگىن» قويۋ سالتاناتى وتەدى. ال «ستۋدەنتتىك» ساياباقتا 11 اسكەري پالاتكا تىگىلىپ، سوعىس ارداگەرلەرى مەن تىل ەڭبەككەرلەرى ءۇشىن مەرەكەلىك داستارقان جايىلادى. سونداي-اق، مەرەكەلىك كونسەرت بارىسىندا سوعىس جىلدارىنداعى اندەر شىرقالادى.
جەڭىس كۇنىنە ارنالعان مەرەكەلىك وتشاشۋ 9- مامىردا ساعات 23:00 دە ەسىل وزەنىنىڭ جاعالاۋىندا بولادى.