ەرجان ماكسيم ونەر كورسەتكەن «گولوس. دەتي» شوۋىنا قاتىستى داۋ تۋىندادى

ورال. قازاقپارات - قازاقستاندىق ءانشى ەرجان ماكسيم قاتىسقان «گولوس. دەتي» كونكۋرسىنىڭ قورىتىندىسىنا بايلانىستى داۋ تۋىندادى، دەپ حابارلايدى قازاقپارات ءتىلشىسى.

ر ب ك مالىمەتىنە قاراعاندا، رەسەيدىڭ ءبىرىنشى ارناسى ءانشى السۋ مەن بانكير يان ابراموۆتىڭ ون جاسار قىزى ميكەللا ابراموۆا جەڭىمپاز دەپ تانىلعان فينالداعى داۋىس بەرۋ قورىتىندىسىنا بايلانىستى تەكسەرۋ جۇرگىزبەكشى.

«ءبىر قاتىسۋشىنىڭ پايداسىنا انومالدى داۋىس بەرۋ بەلگىلەرى بار، سول ماسەلە انىقتالاتىن بولادى»، دەگەن تەلەكومپانيا وكىلى.

ك. ابراموۆانى تەلەكورەرمەندەردىڭ 56,5 پروتسەنتى قولداعان.

داۋىس بەرۋ قورىتىندىسى شىققاننان كەيىن ءتۇرلى ەلدەردىڭ كوپتەگەن كورەرمەندەرى نارازىلىق ءبىلدىرىپ، قايتا ەسەپتەۋدى تالاپ ەتتى.

اتاقتى شوۋمەن ماكسيم گالكين دە ينستاگرامداعى پاراقشاسىنا ۆيدەو جۇكتەپ، ءوز پىكىرىن ءبىلدىردى.

«ءبىز كەشە وتباسىمىزبەن ەرجان ماكسيمگە داۋىس بەردىك. جالپى، فينالعا قاتىسۋشىلاردىڭ دەڭگەيى جوعارى بولدى. ەرجاننان باسقا نينو چەسنەر، اناستاسيا سيساۋري، ۆالەري كۋزاكوۆ، ميشا گريگوريان تاماشا ورىندادى. ميكەللا ابراموۆا دا جاقسى، ءبىراق فينالعا قاتىسۋشىلاردىڭ بارىنەن ارتتا قالدى. ابراموۆانىڭ اتاقتى اتا-اناسى مەن ولاردىڭ جۇلدىزدى دوستارى ءبارىن جاسادى. باسقا انشىلەردىڭ اتا-انالارىندا ونداي مۇمكىندىك جوق. مەنىڭ ويىمشا، جەڭىمپاز جالعىز، ول - ەرجان ماكسيم»، - دەدى م. گالكين.

ەسكە سالا كەتەيىك، بۇدان بۇرىن ورالدىق ەرجان ماكسيمنىڭ «گولوس. دەتي» بايقاۋىنىڭ سۋپەرفينالىندا ونەر كورسەتكەنىن جازعان بولاتىنبىز. داۋىس بەرۋ قورىتىندىسى بويىنشا ەرجان ك. ابراموۆادان كەيىن ەكىنشى ورىن الدى.