قورقىت اتا كىتابىنىڭ تاعى ءبىر ەپوسى تابىلدى

قىزىلوردا. قازاقپارات - «قورقىت اتا» كىتابىنىڭ تاعى ءبىر ەپوسى تابىلدى، دەپ حابارلايدى قازاقپارات ءتىلشىسى.

بۇل جونىندە قىزىلوردا وبلىستىق «رۋحاني جاڭعىرۋ» ورتالىعىنىڭ ءبولىم مەڭگەرۋشىسى، ادەبيەتتانۋ PhD دوكتورى بەكارىس نۇريمان ءمالىم ەتتى. ونىڭ ايتۋىنشا، «قورقىت اتا» كىتابىنىڭ تاعى ءبىر ەپوسى تابىلعان. ول سالۋر «قازاننىڭ ايداھاردى ءولتىرۋى» دەگەن داستان دەپ اتالادى.

«بۇل جاعىمدى جاڭالىقتى تۇركيانىڭ بايبۇرت قالاسىندا وتكەن حالىقارالىق سيمپوزيۋمدا پروفەسسور مەتين ەكيجي بايانداماسىندا بايانداپ بەردى. بۇل سيمپوزيۋم 25-27 -ءساۋىر كۇندەرى ءوتىپ جاتىر. تۇركيالىق عالىم تابىلعان قولجازبانى عالىمداردىڭ ورتاسىندا كورسەتىپ، عىلىمي تۇجىرىمداماسىن جاساعانى تۋرالى حابارلادى» - دەدى بەكارىس نۇريمان.

تۇڭعىش پرەزيدەنت - ەلباسى نۇرسۇلتان نازاربايەۆتىڭ قولداۋىمەن ەلىمىزدە جۇزەگە اسىرىلىپ جاتقان «رۋحاني جاڭعىرۋ» جانە «ۇلى دالانىڭ جەتى قىرى» باعدارلامالارى حالقىمىزدىڭ تاريحىن تۇگەندەۋگە سۇبەلى ۇلەس قوسىپ كەلەدى.

ايتا كەتەلىك، «قورقىت اتا كىتابىنىڭ» درەزدەن جانە ۆاتيكان قالالارىندا ساقتالعان ەكى قولجازباسى بار. ءبىرىنشى نۇسقادا 12، ەكىنشىسىندە 6 داستان جازىلعانى بۇرىننان ءمالىم. مەتين ەكيجيدىڭ ايتۋىنشا، تابىلىپ وتىرعان قولجازبا 13-داستان سانالادى.

«قورقىت اتا» كىتابى - قاھارماندىق ەپوس ۇلگىسى. وعىز- قىپشاق ءداۋىرىنىڭ جازبا مۇراسى رەتىندە باعالانادى.

قورقىت اتا سىر وڭىرىندە ح عاسىردا وعىز- قىپشاق تايپالىق بىرلەستىگىندە ءومىر سۇرگەن. ءتۇبى ءبىر تۇركىنىڭ ورتاق ابىزى سانالادى. بىلتىر قاراشا ايىندا «قورقىت اتا» مۇراسى يۋنەسكو-نىڭ ماتەريالدىق ەمەس مۇرالارى تىزىمىنە ەندى.