ەلباسى: تاريحي سيكل الەمدىك ىقپالداستىق ورتالىعىن شىعىسقا قايتارۋدا
«بۇگىن «ءبىر بەلدەۋ، ءبىر جول» باستاماسىنىڭ العاشقى، تابىستى كەزەڭىنىڭ قورىتىندىسى بويىنشا، مىنا جەتىستىكتەردى اتاي بەرۋگە بولادى دەپ ەسەپتەيمىن. بىرىنشىدەن. الەم شيەلەنىستى گەوساياسي تۇجىرىمدامالاردان قاتتى شارشادى، بۇل گەوەكونوميكا مەن بىرلەسىپ دامۋعا كەدەرگى كەلتىرۋدە. «ءبىر بەلدەۋ، ءبىر جول» ەكونوميكالىق ىنتىماقتاستىق ءۇشىن جاڭا مۇمكىندىكتەر كەشەنى عانا ەمەس، ودان دا جوعارى دەڭگەيدى بەينەلەيدى. بۇل باستاما الەمنىڭ 120 دان استام ەلىنىڭ كۇشتى تاريحي مۇددەسىن، ولاردىڭ قاۋىپسىزدىگىن، كەڭ ساۋدا-ساتتىعى مەن وركەندەۋىن قامتىپ كورسەتەدى. شىنىندا، قىتاي، رەسەي، ەۋروپا جانە ورتالىق ازيا ەلدەرىنىڭ، سونداي-اق زاماناۋي ۇلى جىبەك جولىنىڭ باسقا دا كوپتەگەن قاتىسۋشىلارىنىڭ ارقاسىندا تۇراقتىلىق، دامۋ جانە وركەندەۋ بەلدەۋىنە اينالىپ جاتىر»، - دەدى ول.
ەلباسىنىڭ ايتۋىنشا، ساياسي قايشىلىقتار، سانكسيالار، ساۋدا سوعىسىنا قاراماستان، باستاما اياسىنداعى ساۋدا-ساتتىق كولەمى ءوسىپ جاتىر جانە 5 تريلليون دوللارعا نەمەسە الەمدىك ساۋدانىڭ ۇشتەن ءبىر بولىگىن قۇراپ وتىر.
«ەكىنشىدەن. جاھاندانۋ ءالى دە قاجەت. قازىر ول جاڭا فورماتتا ترانسفورماتسيالانىپ جاتىر. «ءبىر بەلدەۋ، ءبىر جول» باستاماسى شىعىسپەن جاڭا جاھاندانۋ مودەلىن كورسەتتى. تاريحي سيكل الەمدىك ىقپالداستىق ورتالىعىن شىعىسقا قايتارۋدا. ءبىز بۇگىندە ازيانىڭ XXI عاسىردىڭ ءوڭىرى بولعانىن كورىپ وتىرمىز. الەمدىك ج ءى ءو 28 پايىزى وسىندا شوعىرلانعان. بۇل كورسەتكىش ءالى دە وسە بەرەدى. وركەندەۋ ترەندى كووپەراتسيالار ءۇشىن جاڭا باعداردى ۇسىنادى»، - دەپ اتاپ ءوتتى ن. نازاربايەۆ.
ەسكە سالايىق، فورۋمعا 37 مەملەكەتتىڭ كوشباسشىلارى مەن ۇكىمەت باسشىلارى قاتىسىپ جاتىر.
