تاللين قالاسىنىڭ مەرى قىزىلوردا جۇرتشىلىعىنا ريزاشىلىعىن ءبىلدىردى

قىزىلوردا. قازاقپارات - ەستونيا استاناسى - تاللين قالاسىنىڭ جاقىندا سايلانعان مەرى ميحايل كىلۆارت قىزىلوردا وبلىسى جۇرتشىلىعىنا العىسىن بىلدىرگەن جەدەلحات جولدادى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، ميحايل كىلۆارت بيىلعى 11- ساۋىردە تاللين قالاسىنىڭ مەرى بولىپ سايلانعان ەدى. وسىعان وراي قىزىلوردا وبلىسىنىڭ اكىمى قىرىمبەك كوشەربايەۆ سىر جۇرتشىلىعى اتىنان قۇتتىقتاۋ جەدەلحاتىن جولداعان ەدى. ءوز كەزەگىندە ميحايل كىلۆارتتىڭ اتىنان وبلىس اكىمىنە جەدەلحات كەلىپ ءتۇستى. وندا ايماق باسشىسى مەن جەرلەستەرىنە ىزگى تىلەكتەرى ءۇشىن ريزاشىلىعىن بىلدىرگەن.

ايتا كەتەرلىگى، ول قالا باسشىسى قىزمەتىنە جالعىز ۇمىتكەر بولعان ەدى. تاللين قالاسىنداعى تسەنتريست پارتياسى ۇسىنعان ۇمىتكەرگە تاللين قالالىق جينالىسىنىڭ كەزەكتەن تىس سەسسياسىندا دەپۋتاتتاردىڭ باسىم بولىگى سەنىم ءبىلدىردى. وعان حالىق قالاۋلىلارى قاتارىنان 45 دەپۋتات ءۇمىت ارتتى.

سايلاۋدىڭ نەگىزگى تالابى بويىنشا مەر اتاعىن الۋ ءۇشىن كەم دەگەندە 40 داۋىس جيناسا جەتكىلىكتى بولاتىن.

ميحايل كىلۆارت 1977-جىلدىڭ 24- قاراشاسىندا  قىزىلوردا قالاسىندا دۇنيەگە كەلگەن. ءومىربايان دەرەكتەرىنە سۇيەنسەك، ول ءۇش جاسىنان باستاپ تاللين قالاسىندا ءومىر ءسۇرىپ كەلەدى. 1999-جىلدان باستاپ ساياسي سالادا ءتۇرلى قىزمەت اتقارىپ كەلەدى. 2016-جىلدان بەرى تاللين قالاسىنىڭ سپورت، مادەنيەت، ينتەگراتسيا جانە ءبىلىم جونىندەگى ۆيتسە-مەرى قىزمەتىن اتقارعان.