ەركىن كۇرەستەن قىتايدا وتەتىن ازيا چەمپيوناتىنا كىمدەر بارادى؟

نۇر-سۇلتان. قازاقپارات - ەركىن كۇرەستەن ازيا چەمپيوناتىنا قاتىساتىن ۇلتتىق قۇراما مۇشەلەرى بەلگىلى بولدى.

بۇل بالۋاندار 23-29- ساۋىردە قىتايدىڭ سيان قالاسىندا كۇرەس تۇرلەرىنەن جالاۋىن جەلبىرەتەتىن قۇرلىقتىق دودادا ەل نامىسىن قورعايدى، دەپ حابارلايدى قازاقپارات ءتىلشىسى.

ەركىن كۇرەستەن ۇلتتىق قۇرامانىڭ باس باپكەرى اسەت سەرىكبايەۆتىڭ ايتۋىنشا، اتالمىش جارىستا نەگىزىنەن جاستارعا سەنىم ارتىلادى. ولار بيىل شىمكەنت قالاسىندا وتكەن سپارتاكيادا بارىسىندا ىرىكتەلگەن. سپارتاكيادادا چەمپيوندىق اتاققا قول جەتكىزگەن بالۋانداردىڭ بارلىعى دەرلىك ازيا چەمپيوناتىندا بوز كىلەمگە شىعادى.

الداعى ۋاقىتتا ەلىمىزدە وليمپياداعا ليتسەنزيا بەرىلەتىن الەم چەمپيوناتى وتەدى. سول جارىستا قازاقستاندىق بالۋاندار جوعارى دەڭگەيدە ويىن كورسەتۋى ءۇشىن ازيا چەمپيوناتىندا ولاردىڭ دايىندىق بارىسى پىسىقتالادى.

باس باپكەردىڭ ايتۋىنشا، كىشى سالماقتاردا جاپونيا، وڭتۇستىك جانە سولتۇستىك كورەيا بالۋاندارى قارىمدى كەلەدى. سونداي-اق، يران مەن وزبەكستان بالۋاندارى دا وڭاي قارسىلاس ەمەس. سوعان قاراماستان ءبىزدىڭ جىگىتتەر نەگىزىنەن جۇلدەلى ورىندارعا تالاسۋدى الدىنا ماقسات ەتىپ وتىر.

ەركىن كۇرەستەن ازيا چەمپيوناتىنا قاتىساتىن قازاقستان قۇراماسىنا مەيرامبەك قارتباي (57 كەلى)، باۋىرجان تورەبەك (61 كەلى)، داۋلەت نيازبەك (65 كەلى)، نۇرقوجا قايپانوۆ (70 كەلى)، دانيار قايسانوۆ (74 كەلى)، عالىمجان وسەربايەۆ (79 كەلى)، ادىلەت داۋلانبايەۆ (86 كەلى)، ەرالى ابدىراشيەۆ (92 كەلى)، الىشەر ەرعالي (97 كەلى) جانە ولەگ بولتين (125 كەلى) شاقىرتۋ العان.

كۇرەس تۇرلەرىنەن قازاقستان قۇرامالارى بۇگىندە ءاىۆا سپورتتىق بازاسىندا جاتتىعۋدا دايىندىعىن جۇرگىزىپ كەلەدى. قۇراما مۇشەلەرى 20- ساۋىردە قىتايعا اتتانادى.