ادامزات تاريحىندا العاش رەت قارا قۇردىمنىڭ سۋرەتى جاريالاندى

 استانا. قازاقپارات - اسپان الەمى جۇمباققا تولى. سان مىڭداعان جىلدار بويى عالىمدار مەن زەرتتەۋشىلەر جۇلدىزدى الەمنىڭ عاجابىنا ءۇڭىلىپ كەلەدى. اسىرەسە كوبىرەك قىزىقتىراتىنى - قارا قۇردىم.

 گالاكتيكا كىندىگىندەگى قارا قۇردىمنىڭ فوتوسىن ءتۇسىرۋ ءۇشىن الەمدىك زەرتتەۋشىلەر Event Horizon Telescope جوباسىن ازىرلەگەن بولاتىن. ول ءۇشىن جەردىڭ ءار تۇكپىرىنە 8 تەلەسكوپ قويىپ، زەرتتەۋلەرىن باستاعان. مامانداردىڭ بۇل ەڭبەگى ءوز ناتيجەسىن بەرىپ، ادامزات تاريحىندا العاش رەت قارا قۇردىمنىڭ فوتوسى ءتۇسىرىلدى. ونى ءتۇسىرۋ مەن زەرتتەۋ، سونداي- اق جاريالاۋ ءۇشىن 2 -جىلداي ۋاقىت كەتكەن.

"م87 گالاكتيكاسىنداعى قارا قۇردىمنىڭ وسىنشاما ۇلكەن ەكەنىنە سەنە الار ەمەسپىن. ال فوتونى كورگەندە بۇعان ەرىكسىز سەنەسىڭ. ونىڭ وتتى ساقيناسىنان- اق قانشالىقتى گراۆيتاتسيالىق كۇشكە يە ەكەنىن اڭعارۋعا بولادى"، - دەيدى نەيمەگەن ۋنيۆەرسيتەتىنىڭ عالىمى حاينو فالكە.

 قارا قۇردىم - جويقىن تارتىلىس كۇشى ارقىلى بۇكىل ماتەريا مەن جارىق نۇرىن ەش جىبەرمەي وزىنە تارتىپ الاتىن ماسساسى وتە اۋىر جۇلدىزدىق دەنە (ۇڭگىر ەمەس) . ونىڭ ماسساسى وتە جوعارى، تارتىلىس كۇشى ءورىسى تىم جويقىن بولعاندىقتان، ەشقانداي ماتەريا، ماگنيتتى تولقىن، جارىق جىلدامدىعىندا قوزعالادى دەلىنەتىن جارىق رادياتسياسى ودان قاشىپ قۇتىلا المايدى.

بەتىنە تۇسكەن جارىق ەشقاشان كەرى شاعىلىسپايدى، سىرتقا ەش جارىق شىعارمايدى. ال ار جاعى جۇمباق الەم. قارا قۇردىم كۇننەن 21 ميلليارد ەسە اۋىر. ول جەردەن 57 ميلليون جارىق جىلىندا ورنالاسقان.

Massaget.kz