تەڭىز كەن ورنىندا قىزىلشا اۋرۋى تاراعان جوق

 اتىراۋ. قازاقپارات - اتىراۋ وبلىسىندا، سونىڭ ىشىندە تەڭىز كەن ورنىندا ەپيدەميولوگيالىق احۋال ءبىرقالىپتى، دەپ حابارلايدى قازاقپارات.

اتىراۋ وبلىستىق قوعامدىق دەنساۋلىق ساقتاۋ دەپارتامەنتى ماماندارىنىڭ ايتۋىنشا، قىزىلشا اۋرۋىمەن تىركەلگەندەر سانى ازايىپ كەلەدى. جىل باسىنان بەرى جىلىوي اۋدانىنداعى تەڭىز كەن ورنىندا قىزىلشا اۋرۋىنىڭ 4 دەرەگى تىركەلدى.

 «العاشقى وقيعا قاڭتار ايىندا انىقتالدى، ناۋرىزدا قىزىلشامەن 3 ادام اۋىردى. اۋىرعانداردىڭ ەكەۋى قارىم- قاتىناس ارقىلى جۇقتىرعان، جاسى 45 تەن جوعارى، ۆاكسيناعا الۋعا جاتپايدى. قارىم- قاتىناستاعى باسقا ادامدار ەكپە الدى. اۋرۋدىڭ تاراۋى تىركەلگەن جوق، جاعداي باقىلاۋدا» ، - دەپ مالىمدەدى اتىراۋ وبلىستىق قوعامدىق دەنساۋلىق ساقتاۋ دەپارتامەنتىنەن.

ايتا كەتسەك، جىل باسىنان بەرى ايماقتا 9 مىڭ ادام قىزىلشاعا قارسى جوسپارلى ۆاكسيناتسيامەن قامتىلعان. ءساۋىر ايىنان باستاپ قاۋىپ- قاتەر توبىنداعى 9-10 ايلىق نارەستەلەر، 40 جاسقا دەيىنگى مەديتسينالىق قىزمەتكەرلەر مەن قىزىلشا وشاعىنداعى 30 جاسقا دەيىنگى ادامدار ەكپە الىپ جاتىر.

«11 - ساۋىردەگى مالىمەت بويىنشا، قوسىمشا 1062 ادامعا ەكپە سالىندى. قىزىلشاعا قارسى يممۋنداۋ جۇمىستارى جالعاسۋدا، الدىن الۋ، ەپيدەمياعا قارسى شارالاردى ۇيلەستىرۋ شتابى قۇرىلدى، تۇرعىندارمەن تۇسىنىك جۇمىستارى جالعاسىن تاۋىپ جاتىر» ، - دەپ ناقتىلادى دەپارتامەنتتەگىلەر.

 قازىر اتىراۋ وبلىسىندا قىزىلشاعا قارسى ۆاكسينا جەتكىلىكتى. بيىل  16000 دوزا ۆاكسينا الىندى، تاعى قوسىمشا  15450 دوزا الىنادى، سونىمەن قاتار، ءقاۋىپ- قاتەر توبىنداعىلارعا سالۋعا  500  20 دوزا ۆاكسيناعا تاپسىرىس بەرىلدى. ەكپە سالۋ جۇمىستارى ارنايى كابينەتتە وتۋدە. مەديتسينا قىزمەتكەرلەرى ۆاكسيناتسيا وتكىزۋ بويىنشا دايىندىقتان جانە اتتەستاتسيادان وتكەن.