قىتايمەن بىرلەسىپ تۇسىرگەن «كومپوزيتور» فيلمى بەيجىڭ حالىقارالىق كينوفەستيۆالىنە قاتىسادى
اتالعان فەستيۆال 13-20 - ءساۋىر ارالىعىندا قىتاي استاناسىندا وتەدى. ق ح ر نەگىزى قالانۋىنىڭ 70 جىل تولۋىنا وراي كينوفەستيۆالدىڭ بيىلعى تاقىرىبى - «وتان» دەپ اتالادى.
كوركەم لەنتا قىتايلىق كومپوزيتور شي شيڭحايدىڭ كەڭەس وداعى كەزىندە الماتىعا ەۆاكۋاتسيالانعان كەزى جانە ونىڭ قازاق كومپوزيتورى باقىتجان بايقاداموۆپەن دوستىعى تۋرالى باياندايدى. فيلمدى ش. ايمانوۆ اتىنداعى «قازاقفيلم» كينوستۋدياسى جانە قىتايلىق
«Shineworks Pictures», «China film coproduction corporation»
كومپانيالارى تۇسىرگەن.
باقىتجان بايقاداموۆتىڭ وبرازىن تانىمال قازاقستاندىق اكتەر بەرىك ايتجانوۆ سومداعان. ال شي شيڭحايدى قىتايلىق اكتەر حۋ چجۋن وينايدى. سونىمەن قاتار، كارتينادا باسقا دا وتاندىق اكتەرلەر بوي كورسەتەدى - التىناي نوگەربەك، ارۋجان جازىلبەكوۆا، سەرگەي ۋفيمتسيەۆ جانە باسقالار. قويۋشى رەجيسسەرى - شەرزات ياكۋب، سو- رەجيسسەرى - ءسابيت قۇرمانبەكوۆ.
«كومپوزيتور» فيلمى بەيجىڭ كينوفەستيۆالىندە باستى جۇلدەگە - «اسپان عيباداتحاناسى» Tiantan سىيلىعىنا ىرىكتەلىپ الىنعان الەمنىڭ 14 فيلممەن قاتار باق سىنايدى.
Tiantan Award جۇلدەسىنىڭ حالىقارالىق قازىلار القاسى تانىمال كينەماتوگرافيستەردەن قۇرالعان. ولار جۇلدەلەردى ون نوميناتسيا - ۇزدىك كوركەم فيلم، ۇزدىك رەجيسسۋرا، اكتەرلىك شەبەرلىك(سونىمەن قاتار ەكىنشى پلانداعى اكتەر)، ۇزدىك سسەناري، ۇزدىك مۋزىكا جانە ۆيزۋالدى ەففەكتىلەر بويىنشا تابىستايدى. قازىلار القاسىنا «ارىستان پاتشا» انيماتسيالىق فيلمى بويىنشا تانىلعان، امەريكالىق رەجيسسەر جانە پروديۋسەر روب مينكوف ءتوراعالىق ەتەتىن بولادى.
بەيجىڭ قالاسى اكىمشىلىگىنىڭ قولداۋىمەن بەيجىڭ حالىقارالىق كينوفەستيۆالى جىل سايىن 2011 -جىلدان باستاپ ءوتىپ كەلەدى. Tiantan Award-2019 پرەمياسىنىڭ جەڭىمپازدارى 2019 -جىلدىڭ 20 -ءساۋىر كۇنى كينوفەستيۆالدىڭ جابىلۋ سالتاناتىندا بەلگىلى بولادى.
ەستەرىڭىزگە سالا كەتەيىك، «كومپوزيتور» فيلمىنىڭ ءوندىرىسى ۇكىمەت دەڭگەيىندە ۇيىمداستىرىلعان بولاتىن. 2015 -جىلى 31 - تامىزدا ق ر تۇڭعىش پرەزيدەنتى - ەلباسى نۇرسۇلتان نازاربايەۆ جانە قىتاي حالىق رەسپۋبليكاسىنىڭ ءتوراعاسى شي جينپيڭنىڭ قاتىسۋىمەن وتكەن مادەني- گۋمانيتارلىق ىنتىماقتاستىق تۋرالى كەلىسىمگە قول قويىلعان كەزدە ۋاعدالاستىق ەتىلگەن. ق ر مادەنيەت جانە سپورت مينيسترلىگىنىڭ ۇسىنىسى بويىنشا ش. ايمانوۆ اتىنداعى «قازاق فيلم» ا ق مەن قىتايلىق Shineworks Pictures كومپانياسى اراسىندا اتالعان فيلمدى بىرلەسە ءوندىرۋ، قارجىلاندىرۋ، جانە پايدالانۋ جونىندە كەلىسىمگە وتىرعان.
2017 -جىلى 8- ماۋسىمدا ق ح ر ءتوراعاسى شي جينپيڭنىڭ قازاقستانعا جاساعان ساپارى اياسىندا قول قويىلعان بىرلەسىپ كينوءوندىرىستى جۇرگىزۋ تۋرالى مەملەكەت ارالىق كەلىسىم نەگىزىندە اتالعان كينوجوبا ىسكە اسقان بولاتىن.
كارتينانىڭ تۇسىرىلىمدەرى 2017 -جىلى ءوتىپ، فيلمنىڭ ءبىراز بولىگى قازاقستاندا جۇرگىزىلدى.
