ەلوردادا «بالۋان شولاق» فيلمىنىڭ تۇساۋى كەسىلدى

نۇر-سۇلتان. قازاقپارات - ەلوردادا رەجيسسەر نۇرگەلدى سادىعۇلوۆ تۇسىرگەن «بالۋان شولاق» فيلمىنىڭ پرەمەراسى ءوتتى، دەپ حابارلايدى قازاقپارات ءتىلشىسى.

فيلمنىڭ تۇساۋكەسەرىنە ەلىمىزگە بەلگىلى ونەر جانە قوعام قايراتكەرلەرى، پارلامەنت دەپۋتاتتارى، ءتۇسىرىلىم توبىنىڭ مۇشەلەرى مەن قالىڭ كورەرمەن قاتىستى.

«قۇرمەتتى ونەرسۇيەر قاۋىم! بۇگىن ءبارىمىز ءۇشىن تاريحي كۇن دەسەم دە بولادى. نەگە دەسەڭىزدەر، قازاق حالقىنىڭ ماقتانىشى بالۋان شولاق تۋرالى كوركەم فيلمدى نازارلارىڭىزعا ۇسىنىپ وتىرمىز. بۇل فيلم سەناريىنىڭ اۆتورى - جازۋشى، دراماتۋرگ دۋلات يسابەكوۆ اعامىز. سونىمەن بىرگە، فيلمنىڭ اۆتورىنىڭ يدەياسىنىڭ باس پروديۋسسەرى ءسابيت ءابدىزالىققا العىسىمىزدى بىلدىرەمىز. رەجيسسەر نۇرگەلدى سادىعۇلوۆ پەن باستى ءرولدى سومداعان ەركەبۇلان دايىروۆقا دا كوپتىڭ العىسى مول. وزدەرىڭىز بىلەتىندەي، ەلىمىزدە بىرنەشە تاريحي فيلمدەر شىعىپ جاتىر. جاقىندا عانا وزدەرىڭىز «التىن تاق» فيلمىن تاماشالادىڭىزدار. سول سەكىلدى «امىرە» فيلمى گولليۆۋدتا ەڭ ۇزدىك شەتەلدىك فيلم نوميناتسياسىن جەڭىپ الدى. كوپتەگەن ءىرى-ءىرى تۋىندىلار شىعۋدا. ەلباسىنىڭ «رۋحاني جاڭعىرۋ» باعدارلامالىق ماقالاسىنىڭ اياسىندا وسى شارۋالاردىڭ اتقارىلىپ جاتقانىن ەرەكشە اتاپ وتكىم كەلەدى»، - دەدى پرەمەراعا كەلگەن مادەنيەت جانە سپورت ءمينيسترى ارىستانبەك مۇحامەدي ۇلى.

وسىدان كەيىن ءسوز العان دۋلات يسابەكوۆ فيلمگە حالىقتىڭ قالاي باعا بەرەتىنىن اتاپ ءوتتى.

«پرەمەرا العاش الماتىدا ءوتىپ ەدى. حالىق جىلى قابىلداپ جاتىر. «بالۋان شولاقتىڭ» پەسا تۇرىندەگى نۇسقاسى دا ءبىرشاما كوپتىڭ كوڭىلىنەن شىققان ەدى. جاقسى شىعارما تۋىلۋى مۇمكىن. ءبىراق، ونى كورسەتە بىلەتىن ازامات، قولدايتىن مەملەكەت كەرەك. وسى جاعىنان قاسىمدا تۇرعان ارىستانبەك ىنىمە العىس ايتامىن»، - دەدى دۋلات يسابەكوۆ.

ورتادا اكتەر ەركەبۇلان دايىروۆ تا ءسوز سويلەدى. اكتەر ورتاعا شىققان كەزدە مينيستر «ەركەبۇلان اپ-ارىق ادەمى جىگىت بولاتىن. بالۋان شولاققا ءتۇسۋ ءۇشىن كۇندىز- ءتۇنى سپورت زالدان شىقپاي، ناعىز بالۋان بولدى» دەپ كوپتىڭ قوشەمەتىمەن دايىروۆتى ورتاعا شاقىردى.

«2011-جىلدان بەرى اۋەزوۆ تەاترىنداعى ساحنادا «بالۋان شولاق» پەساسى ساحنالانىپ كەلە جاتىر. سول سپەكتاكلدە «بالۋان شولاقتى» ويناپ ءجۇرىپ، شىركىن، وسى تۋىندى فيلمگە اينالسا دەپ ارماندايتىن ەدىم. سول كۇنگە دە جەتىپ وتىرمىز. كينومىز عۇمىرلى بولسىن»، - دەدى ەركەبۇلان دايىروۆ.

فيلمنىڭ كورسەتىلىمى ەكى زالدا دا بىردەي ءوتتى. ينە شانشار ورىن بولماۋىنا قاراعاندا، ءبىرشاما «كاسسالىق» فيلمگە اينالارىنا ءۇمىت بار. رەجيسسەر نۇرگەلدى سادىعۇلوۆ بالۋان شولاق ءومىرىنىڭ كەلىمسەكتەردى كوشىرۋ كەزىندەگى جەر ءۇشىن كۇرەس كەزەڭى سۋرەتتەلەتىنىن اتاپ وتكەن ەدى. ەندەشە، بالۋان بابانىڭ كۇرەسكەرلىگىنە باسىمدىق بەرىلگەن فيلم كينوزالعا ءبىرشاما قاۋىمدى تارتارى ءسوزسىز.

ەسكە سالا كەتسەك، 18- ساۋىردەن باستاپ جالپى ۇلتتىق پروكاتقا شىعاتىن «بالۋان شولاق» فيلمىنىڭ ترەيلەرى جاريالانعانىن بۇعان دەيىن حابارلاعان بولاتىنبىز.

فيلمنىڭ پروكاتى ەل ىشىمەن شەكتەلىپ قالمايدى. قازاقتىڭ حالىق كومپوزيتورى، ات ويىنىنىڭ ءتۇرلى ءتاسىلىن مەڭگەرگەن ونەرپاز، كۇش ونەرىن كورسەتكەن سپورتشى، جاۋىرىنى جەرگە تيمەگەن بالۋان بالۋان شولاق (نۇرماعانبەت بايمىرزا ۇلى) تۋرالى فيلم داعىستاندا دا كورسەتىلەتىن بولدى.